Песнопения праздника Рождества Христова

Стихира на Господи воззвах, глас 2
 
Приидите, возрадуемся Господеви, настоящую тайну сказующе: средостение градежа разрушися, пламенное оружие плещи дает, и Херувим отступает от дре­ва жизни и аз райския пищи причащаюся, от негоже произгнан бых преслушания ради. Неизменный бо образ Отечь, образ присносущия Его, зрак раба приемлет, от неискусобрачныя Матере прошед, не преложение претерпев: еже бо бе, пребысть, Бог сый истинен: и еже не бе прият, человек быв человеколюбия ради, Тому возопиим: рождейся от Девы, Боже, помилуй нас.
 
Стихира на литии, глас 1
 
Небо и земля днесь пророчески да возвеселятся, ангели и человецы духовно да торжествуют: яко Бог во плоти явися, сущим во тьме и сени седящим, рождей­ся от Девы, вертеп и ясли прияша Того: пастырие чудо проповедуют, волсви от восток в Вифлеем дары приносят. Мы же хвалу недостойными устнами ангельски Тому принесем: слава в вышних Богу, и на земли мир: прииде бо чаяние языков, пришед спасе нас от работы вражия.
 
Стихира на стиховне, глас 2
 
Велие и преславное чудо совершися днесь: Дева раждает и утроба не ис­тлевает: Слово воплощается, и Отца не отлучается. Ангели с пастырьми славят, и мы с ними вопием: слава в вышних Богу, и на земли мир.
 
Тропарь, глас 4
 
Рождество Твое, Христе Боже наш, возсия мирови свет разума: в нем бо звездам служащий звездою учахуся Тебе кланятися Солнцу Правды, и Тебе ведет с высоты Востока; Господи, слава Тебе.
 
Кондак, глас 3
 
Дева днесь Пресущественнаго раждает, и земля вертеп Неприступному при­носит; ангели с пастырьми славословят, волсви же со звездою путешествуют; нас бо ради родися Отроча младо, Превечный Бог.
 
Величание
 
Величаем Тя, Живодавче Христе, нас ради ныне плотию рождшагося от Безневестныя и Пречистыя Девы Марии.
 
Стихира на хвалитех, глас 4
 
Веселитеся, праведнии, небеса радуйтеся, взыграйте горы, Христу рождшуся: Дева седит херувимом подобящися, носящи в недрах Бога Слова воплощен­на; пастырие рожденному дивятся; волсви Владыце дары приносят; ангели воспевающе глаголют: Непостижиме, Господи, слава Тебе.
 
Задостойник
 
Величай, душе моя, Честнейшую и Славнейшую горних воинств Деву Пречи­стую Богородицу.
Любити убо нам, яко безбедное страхом удобее молчание, любовию же, Дево, песни ткати спротяженно сложенныя неудобно есть: но и, Мати, силу, елико есть произволение, даждь.
 
Распечатать Распечатать

Комментирование закрыто.