Песнопения праздника Крещения Господня

Стихира на Господи воззвах, глас 2

Просветителя нашего, просвещающаго всякаго человека, видев Предтеча кре­стится пришедша, радуется душею, и трепещет, рукою показует Его, и глаголет людем: Сей избавляяй Израиля, свобождаяй нас от нетления. О, безгрешный Христе Боже наш, слава Тебе.

Стихира на литии, глас 4

Одеваяйся светом яко ризою, нас ради по нам быти сподобился есть, во струи одевается днесь Иорданския: не Сам сих ко очищению требуя, но нам Собою устояяй порождение. О чудесе! Без огня изваряет, и назидает без сокрушения, и спасает в Него просвещаемыя, Христос Бог и Спас душ наших.

Стихира на стиховне, глас 2

На Иорданстей реце, видев Тя Иоанн к себе грядуща, глаголаше: Христе Боже, что к рабу пришел еси, скверны не имый, Господи? Во имя же чие Тя крещу? Отца? Но Того носиши в Себе. Сына? Но Сам еси воплотивыйся. Духа Святаго? И Сего веси даяти верным усты: явлейся Боже, помилуй нас.

Тропарь, глас 1

Во Иордане крещающуся Тебе, Господи, Троическое явися поклонение: Родителев бо глас свидетельствоваше Тебе, возлюбленнаго Тя Сына именуя: и Дух в виде голубине извествоваша словесе утверждение. Явлейся, Христе Боже, и мир просвещей слава Тебе.

Кондак, глас 4

Явился еси днесь вселенней, и свет Твой, Господи, знаменася на нас, в разуме поющих Тя: пришел еси и явился еси, Свет неприступный.

Величание

Величаем Тя, Живодавче Христе, нас ради ныне плотию крестившагося от Иоанна в водах Иорданских.

По 50-м псалме стихира, глас 6

Бог Слово явися плотию роду человеческому, стояше крестится, во Иорда­не и глаголаше к Нему Предтеча: како простру руку, и прикоснуся верху держа­щего всяческая? Аще и от Марии еси Младенец, но вем Тя Бога Превечнаго: по земли ходиши певаемый от Серафим, и раб Владыку крещати не научихся. Непостижиме Господи, слава Тебе.

Стихира на хвалитех, глас 1

Свет от Света, возсия мирови Христос Спас наш, явлейся Бог: Сему людие поклонимся.

Задостойник

Величай, душе моя, Честнейшую горних воинств Деву Пречистую Богороди­цу.
Недоумеет всяк язык благохвалити по достоянию, изумевает же ум и премирный пети Тя, Богородице; обаче Благая сущи, веру приими, ибо любовь веси божественную нашу: Ты бо христиан еси Предстательница, Тя величаем.
Распечатать Распечатать

Комментирование закрыто.