Песнопения праздника Рождества Пресвятой Богородицы

Стихира на Господи воззвах, глас 6
 
Днесь иже на разумных Престопех почиваяй Бог, престол свят на земли Себе предуготова, утвердивый мудростию небеса, небо одушевленное челове­колюбием содела: от неплоднаго бо корене сад живоносен израсти нам Матерь Свою, иже чудес Бог, и ненадеющихся надежда, Господи, слава Тебе.
 
Стихира на литии, глас 1
 
Начало нашего спасения, людие, днесь бысть: се бо пронареченная от ро­дов древних, Мати и Дева, и приятелище Божие, от неплодове родится проис­ходит, цвет от Иессеа, и от корене его жезл прозябе. Да радуется Адам прао­тец, и Ева да веселится радостию: се бо созданная от ребра Адамова, дщерь и внуку блажит явственне. Родися бо мне, рече, избавление, егоже ради от уз адовых свобождуся, да радуется Давид бия в гусли, и да благословит Бога: се бо Дева происходит от утробы неплодныя, ко спасению душ наших.
 
Стихира на стиховне, глас 4
 
Всемирная радость от праведных возсия нам, от Иоакима и Анны всепетая Дева, яже премногия ради чистоты храм Божий одушевленный бывает: и едина воистину Богородица познавается, Тоя молитвами, Христе Боже, мир миру низпосли. и душам нашим велию милость.
 
Тропарь, глас 4
 
Рождество Твое, Богородице Дево, радость возвести всей вселенней: из Тебе бо возсия Солнце правды, Христос Бог наш, и разрушив клятву, даде благосло­вение, и упразднив смерть, дарова нам живот вечный.
 
Кондак, глас 4
 
Иоаким и Анна поношения безчадства, и Адам и Ева от тли смертныя свободистася, Пречистая, во святем рождестве Твоем. То празднуют и людие Твои, вины прегрешений избавльшеся, внегда звати Ти: неплоды раждает Богородицу, и питатепьницу жизни нашея.

Величание
 
Величаем Тя, Пресвятая Дево, и чтим святых Твоих родителей, и всеславное славим рождество Твое.
 
Стихиры на хвалитех, глас 1
 
О дивнаго чудесе! Источник жизни от неплодныя раждается, и благодать плодородити светло начинается. Веселися, Иоакиме, Богородицы быв родитель: несть ин якоже ты, земнородных родитель, богоприятне; боговместимая бо От­роковица, Божие селение, пресвятая гора тобою нам даровася.

Прокимен на литургии, глас 3
 
Величит душа моя Господа, и возрадовася дух мой о Бозе, Спасе моем.
 
Задостойник
 
Величай, душе моя, преславное рождество Божия Матере. Чужде матерем девство, и странно девам деторождение: на Тебе, Богороди­це, обоя устроишася, тем Тя вся племена земная непрестанно величаем.

Распечатать Распечатать

Комментирование закрыто.