Песнопения праздника введения во храм

Стихира на Господи воззвах, глас 1

Днесь верит ликовствуим, во псалмех и песнех Господеви поюще, и чтуще Того Священную сень, Одушевленный Кивот, Невместимое Слово вместившую: приводится бо Господеви, паче естества плотию младенствующи, и святитель великий Захариа приемлет с веселием Сию, яко Божие Жилище.

Стихира на литии, глас 1

Да радуется днесь небо свыше, и облацы веселие да кропят о зело преславных величиих Бога нашего: се бо дверь на востоки зрящая, рождшися от неплоцове безплодныя по обетованию, и Богу освящена бывши в жилище, днесь в храм яко непорочное приношение приводится: да радуется Давид, бряцая в гус­ли, приведутся, рече, Царю девы в след Ея, ближняя Ея приведутся внутрь скинии, внутрь очистилища его, воспитатися в жилище, прежде век от Отца не­тленно рождшагося, во спасение душ наших.

Стихира на стиховне, глас 5

Радуется небо и земля, небо умное грядущее зряще, в Божественный дом воспитатися честно, Деву едину и Непорочную, к Нейже дивяся Захариа вопияше: Двере Господня, храма отверзаю Тебе двери, радующися в нем ликовствуй. Познах бо и веровах, яко уже избавление приидет проявленно Израилево, и родится из Тебе Бог Слово, даруяй мирови велию милость.

Тропарь, глас 4

Днесь благоволения Божия предображение, и человеков спасения проповедание, в храме Божий ясно Дева является, и Христа всем предвозвещает, Той и мы велегласно возопиим: радуйся, смотрения Зиждителева исполнение.

Кондак, глас 4

Пречистый храм Спасов, многоценный чертог и Дева, священное сокровище славы Божия, днесь вводится в дом Господень, благодать совводящи, яже в Дусе Божественном, юже воспевают ангели Божий: Сия есть селение небесное.

Величание

Величаем Тя, Пресвятая Дево, Богоизбранная Отроковице, и чтим еже в храм Господень вхождение Твое.

Стихира на хвалитех, глас 1

Свещеносицы девы Приснодеву светло провождающе, пророчествуют истин­но духом будущее: храм бо Божий Богородица сущи, в храм со славою дев­ственною, младенствующи, вводится.

Прокимен на литургии, глас 3

Величит душа Моя Господа, и возрадовася дух Мой о Бозе Спасе Моем.

Задостойник
 
Ангели вхождение Пречистыя зряще удивишася: како Дева вниде во святая святых.
Яко одушевленному Божию Кивоту, да никакоже коснется рука скверных. Устне же верных Богородице немолчно глас ангела воспевающе, с радостию да вопиют: истинно вышши всех еси, Дево Чистая.

Распечатать Распечатать

Комментирование закрыто.