Святые мученики Антоний, Иоанн и Евстафий

Тропарь, глас 4
 
Иже земных чести и славы отвергшеся доблии и честнии страдальцы, веры ради крепко и мужественно муки претерпесте, на смерть себе вдавше за Живот всех Владыку. Темже и Христос преславно, столпом облачным с небесе вас озари и, почестьми и венцы от Престола Славы венча, со Ангелы Тому предстояще, молите спастися душам нашим.
 
Величание
 
Величаем вас, страстотерпцы святии Антоние, Иоанне и Евстафие, и чтем честная страдания ваша, яже за Христа претерпели есте.
 
Молитва
 
Святии мученицы Антоние, Иоанне и Евстафие! Призрите с небеснаго чертога на требующих вашей помощи и не отвергните прошений наших; но яко приснии благодетели и ходатаи наши, молите Христа Бога, да человеколюбив и многомилостив сый, сохранит нас от всякаго лютаго обстояния: от труса, потопа, огня, меча, нашествия иноплеменников и междоусобныя брани. Да не осудит нас грешных по беззакониям нашим, и да не во зло обратим благая, даруемая нам от всещедраго Бога, но во славу святаго Имени Его и в прославление крепкаго вашего заступления. Да молитвами вашими даст нам Господь мир помыслов, воздержание от пагубных страстей и от всякия скверны; и да укрепит во всем мире Свою едину Святую, Соборную и Апостольскую Церковь, юже стяжал есть честною Своею кровию. Молитеся прилежно, святии мученицы, да утвердит Христос Бог во Святей Своей Православной Церкви живый дух правыя веры и благочестия; да вси члены ея, чистии от суемудрия и суеверия, духом и истиною покланяются Ему и усердно пекутся о соблюдении Его заповедей; да мы вси в мире и благочестии поживем в настоящем веце и достигнем блаженныя вечныя жизни на небеси, благодатию Господа нашего Иисуса Христа, Ему же подобает всякая слава, честь и держава со Отцем и Святым Духом, ныне и присно и во веки веков. Аминь.
 
Святые мощи мучеников Антония, Иоанна и Евстафия ныне нетленно пребывают в Свято-Духовом монастыре г. Вильнюса
Распечатать Распечатать

Комментирование закрыто.