Служба святаго мученика Гавриила младенца, Белостокскаго

(20 апреля / 3 мая)

ВЕ́ЧЕР

Блаже́н муж: 1-й антифо́н. На Го́споди, воззва́х:

поста́вим стихо́в 8, пра́зднику 3 и свято́му 5, глас 1:

А́ще не обратите́ся и не я́ко младе́нцы незло́бивии пребу́дете, не мо́жете в Ца́рствие Небе́сное вни́ти,— си́це науча́ет дру́ги Своя́ Христо́с, и́мже ча́шу страсте́й Свои́х обещава́ет пи́ти; сию́ у́бо спаси́тельную ча́шу и Гаврии́л младе́нец прие́млет, младе́нческим незло́бием му́ченический вене́ц преукраша́я и того́ ра́ди сугу́бое стяжа́в дерзнове́ние, во е́же моли́тися о спасе́нии душ на́ших.

Глас 2: Стека́ется собо́рище иуде́йское, от Бре́ста же и Белосто́ка, да непоро́чнаго младе́нца му́кам преда́ст. О, беззако́нных, о, неве́рных! сего́ непротивле́нием не вразуми́вшихся, и младе́нческую кровь до конца́ истощи́вших, и роди́тели того́ обезча́дствовавших, но мы, свята́го му́ченика благогове́йно почита́юще, того́ днесь призове́м в моли́тву, о е́же такова́го жестосе́рдия нам изба́витися и спасти́ся душа́м на́шим.

Не пла́чите, роди́тели убие́ннаго от иуде́й отроча́те, его́же хла́дное те́ло, от плотоя́дных птиц чуде́сне охраня́емое, обрето́сте; не пла́чите и не рыда́йте, сие́ исте́рзано от мучи́телей зря́ще, зане́ дух Гаврии́лов уже́ со А́нгелы ра́дуется, пору́ганное же те́ло его́ тле́нию не присту́пно яви́тся и я́ко исто́чник исцеле́ний всем ве́рным во ве́ки пребу́дет, во увере́ние и́стинныя ве́ры и во спасе́ние душ на́ших.

О́ле безу́мия иуде́йскаго! и́бо и пси разу́мнее вас яви́шася, ника́коже телесе́ свята́го косну́тися дерзну́вше, но сие́ от вран охрани́вше тща́тельно, неве́рствие ва́ше облича́юще и христиа́нскую ве́ру утвержда́юще, весть бо Госпо́дь и безслове́сными тва́рьми Своя́ уго́дники прославля́ти. О, блаже́нный жре́бий святы́х Твои́х, Го́споди, и́хже моли́твами просвети́ и спаси́ ду́ши на́ша.

Сла́ва, глас 8:

О, ужа́снаго твоего́ по́двига, младе́нче святы́й Гаврии́ле! О, тя́жких мук твои́х, надо́лзе претерпе́нных! Вои́стинну укрепля́ющей благода́ти Бо́жией досто́ин яви́лся еси́ и дре́вним седми́ Маккаве́ом тве́рдостию души́ уподо́бился еси́, от недосто́йных единоплеме́нник тех умерщвля́емь, но все́ми стра́шными терза́ньми Христа́ не отлучи́выйся и ду́хом чи́стым к Нему́ пресели́выйся, нас же моли́твою твое́ю в ве́ре утвержда́яй и твое́й ре́вности подража́ти науча́яй.

И ны́не, пра́здника.

 Вход. Проки́мен дне и чте́ния 3 му́ченическая

       

Проро́чества Иса́иина чте́ние (глава́ 43):

Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. Кто возвести́т сия́? Или́, я́же испе́рва, кто возвести́т вам? Да приведу́т свиде́тели своя́, и оправдя́тся, и да услы́шат, и да реку́т и́стину. Бу́дите Ми свиде́тели, и Аз Свиде́тель, глаго́лет Госпо́дь Бог, и О́трок Мой, Его́же избра́х: да уве́сте, и ве́руете Ми, и уразуме́ете, я́ко Аз есмь. Пре́жде Мене́ не бысть ин бог, и по Мне не бу́дет. Аз Бог, и несть, ра́зве Мене́, спаса́яй. Аз возвести́х и спасо́х, укори́х и не бе в вас чу́ждий. Вы Мне свиде́тели, и Аз Свиде́тель, глаго́лет Госпо́дь Бог. Еще́ от нача́ла, и несть изыма́яй от руку́ Мое́ю. Сотворю́, и кто отврати́т е? Та́ко глаго́лет Госпо́дь Бог, избавля́яй вас, Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их: и е́же от нас ше́ствие – сокруше́ние, они́ же суть в ми́ре. Ибо пред лице́м челове́ческим, а́ще и му́ку прии́мут, упова́ние их безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я и обре́те их досто́йны Себе́. Я́ко зла́то в горни́ле, искуси́ их и, я́ко всепло́дие же́ртвенное, прия́т я. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину и ве́рнии в любви́ пребу́дут Ему́. Я́ко благода́ть и ми́лость в преподо́бных Его́ и посеще́ние во избра́нных Его́.

Прему́дрости Соломо́новы чте́ние  (глава́  4):

Пра́ведник же а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ лет изчита́ется. Седи́на же есть му́дрость челове́ком, и во́зраст ста́рости житие́ нескве́рно. Благоуго́ден Бо́гови быв, возлю́блен бысть, и живы́й посреде́ гре́шник преста́влен бысть: восхище́н бысть, да не зло́ба измени́т ра́зума его́,  или́ лесть прельсти́т ду́шу его́. Раче́ние бо зло́бы помрача́ет до́брая, и паре́ние по́хоти пременя́ет ум незло́бив. Сконча́вся  вма́ле испо́лни лета до́лга: уго́дна бо бе Го́сподеви душа́ его́, сего́ ра́ди потща́ся от среды́ лука́вствия; лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

 

На литии́ стихи́ры пра́здника или́ хра́ма.

Сла́ва, свято́му, глас 4:

     Младе́нец и му́ченик и ве́ры и́стинныя утвержде́ние, свя́те Гаврии́ле, яви́лся еси́ и безу́мие иуде́йское нетле́нием твоего́ телесе́ обличи́л еси́, те́мже и нас проти́ву неве́рия и е́реси моли́твами твои́ми укрепи́ и Ца́рствия Небе́снаго уче́ние вложи́ в сердца́ на́ша, да тя просла́вим, засту́пника на́шего, подаю́щаго душа́м на́шим мир и всем, призыва́ющим тя, ве́лию ми́лость.

 

И ны́не, пра́здника.

На стихо́вне стихи́ры, глас 3:

Кто не умили́тся се́рдцем, му́ки твоя́ помина́яй, блаже́нне, я́же чрез де́вять дний от нечести́вых претерпева́ти изво́лил еси? Пе́рвее бо, кровь твою́ пома́лу изли́вше, е́ле жи́ва су́ща тя оста́виша иуде́и, да мно́жайшим му́кам предаду́т твое́ непоро́чное те́ло, е́же и сме́рти преда́вше коне́чным кро́ве истоща́нием, на ни́ву в день Свято́й Па́схи то́е безсту́дне изверго́ша; мы же, твоя́ безчи́сленныя ра́ны целу́юще, по́двиги твоя́ те́пле прославля́ем.

Стих: Пра́ведник, я́ко фи́никс, процвете́т, я́ко кедр, и́же в Лива́не, умно́жится.

Собра́вшимся на коне́чное убие́ние Гаврии́ла младе́нца иуде́ом, того́ уже́ изму́ченное те́ло на стене́ ра́спято бысть, и ре́бра ему́ ору́жием мно́гажды прободо́ша, ниже́ стена́ниями его́ умили́шася нечести́вии, ниже́ об отмще́нии Госпо́дни помы́слити хотя́ху, но сего́, я́ко му́ченика, просла́ви Христо́с Бог наш и я́ко подо́бника Своея́ спаси́тельныя стра́сти Христиа́ном чти́ти повелева́ет.

Стих: Насажде́ни в дому́ Госпо́дни, во дво́рех Бо́га на́шего процвету́т.

Зри, о душе́ моя́ окая́нная, каково́е му́жество во младе́нчестем телеси́ явля́ет Гаврии́л му́ченик, ка́ко той от Христа́ не отрече́ся, а́ще и па́че седми́цы муче́ниям предава́шеся; не облени́ся у́бо, душе́ моя́, проти́ву страсте́й подвиза́тися, устыди́ся младе́нца блаже́ннаго, мно́жество мучи́телей победи́вшаго, и тому́ со усе́рдием помоли́ся, да на неви́димыя враги́ победи́тель яви́шися.

 

Сла́ва, глас 7:

У́жас бе ви́дети роди́телем младе́нческое те́ло, лю́те исте́рзано, на ни́ве посреде́ псов, а́ки стра́жей ве́рных, лежа́щее, из него́же всю кровь мучи́тели извлеко́ша и ко́жу его́ повсю́ду прободо́ша, оба́че Боже́ственная сла́ва, чрез звере́й я́вленная, отцу́ и ма́тери сле́зы на упова́ние преложи́, и ве́ру Христо́ву в росси́йстех лю́дех утверди́, и нас к пе́нию сла́вы твоея́, му́чениче, воздвиза́ет.

И ны́не, пра́здника.

На благослове́нии хле́бов тропа́рь, глас 5:

    Святы́й младе́нче Гаврии́ле, ты за Прободе́ннаго нас ра́ди от иуде́и лю́те от о́нехже в ре́бра прободе́н был еси́ и за Истощи́вшаго кровь Свою́ за нас все те́ло твое́ на истоще́ние кро́ве в лю́тыя я́звы пре́дал еси́, ны́не же во сла́ве ве́чней с Ним всели́лся еси́. Тем помяни́ и нас, мо́лим, зде чту́щих па́мять твою́, прося́ нам здра́вие телеси́ и спасе́ние душа́м на́шим.

       

НА У́ТРЕНИ

На Бог Госпо́дь: тропа́рь пра́здника, два́жды.

Сла́ва, свята́го. И ны́не, пра́здника.

По 1-м стихосло́вии седа́лен пра́здника

или сей, глас 1:

Возсия́ нам па́мять муче́ний твои́х, Гаврии́ле, о младе́нцех к Бо́гу хода́таю тепле́йший, муже́м же и же́нам терпе́ния учи́телю; прииди́те, того́ подража́ем по́двиги и на бесо́вския прило́ги му́жественно ополчи́мся, младе́нца му́ченика в по́мощь призыва́юще.

 

Сла́ва, и ны́не, пра́здника.

По 2-м стихосло́вии седа́лен пра́здника

или сей, глас 2:

Написова́шеся в ле́тописи Заблу́довстей, я́ко убие́нный от иуде́й Гаврии́л младе́нец то́йже в кни́зе живо́тней написова́шеся, я́ко му́ченик и чудотво́рец, его́же моли́твами и нас да не изгла́дит из кни́ги живота́ Христо́с и Спас душ на́ших.

 

Сла́ва, и ны́не, пра́здника.

Псало́м избра́нный му́чеником и велича́ние:

Велича́ем тя, страстоте́рпче святы́й, младе́нче Гаврии́ле, и чтим честна́я страда́ния твоя́, я́же за Христа́ претерпе́л еси́.

По полиеле́и седа́лен, глас 3:

Излия́нною твое́ю кро́вию, Гаврии́ле, му́чениче Христо́в, иуде́йское нече́стие посрамля́ется, и ерети́ческая блужда́ния облича́ются, и неду́зи разли́чнии исцеля́ются, и ду́ши на́ша ве́рою спаса́ются.

Сла́ва, и ны́не, пра́здника.

    Степе́нна, 1-й антифо́н, 4-го гла́са. Проки́мен, глас 4:

Пра́ведник, я́ко фи́никс, процвете́т, и я́ко кедр, и́же в Лива́не, умно́жится.

Стих: Насажде́ни в дому́ Госпо́дни, во дво́рех Бо́га на́шего процвету́т. Вся́кое дыха́ние: Ева́нгелие от Луки́, зача́ло 63. Та́же, Воскресе́ние Христо́во ви́девше:

По 50-м псалме́ стихи́ра, глас 2:

Днесь льсти́вными словесы́ младе́нец из до́ма о́тча изво́дится, днесь непови́нная того́ кровь пролива́ется, и в подзе́мная святы́й Гаврии́л от иуде́й заключа́ется, и мучи́телей со́нмище собира́ется, днесь сове́т зло́бы исполня́ется и лю́той сме́рти отроча́ предае́тся, дух же его́ Небе́сным чино́м сочетава́ется, и мы тому́ вопие́м, уми́льно глаго́люще: спаса́й нас предста́тельством твои́м, уго́дниче Бо́жий и му́чениче Христо́в, Гаврии́ле блаже́нне.

Кано́н пра́здника на 6 и свята́го на 8, его́же краегране́сие: Младе́нца моли́твами спаси́ мя. Глас 4.

 

Песнь 1

Ирмо́с: Ли́цы изра́ильтестии невла́жными стопа́ми понт Чермны́й и вла́жную глубину́ прогна́вшее вса́дники триста́ты,* враги́, ви́дяще в ней погруже́ны, с весе́лием поя́ху: пои́м Бо́гу на́шему, я́ко просла́вися.

Младе́нче и му́чениче, чудотво́рче и боле́зней цели́телю, Гаврии́ле, уго́дниче Христо́в, досто́йными словесы́ твоя́ по́двиги восхвали́ти недоуме́ю, оба́че твоего́ терпе́ния и незло́бия красото́ю умиля́юся, сих дарова́ний прича́стника и мене́ покажи́, твоего́ моли́твенника.

Лю́дие росси́йстии от иуде́й уму́ченнаго младе́нца ви́девше, от псов же несмы́сленных, я́ко сокро́вище, охраня́ема, взыва́ху: Го́споди, того́ моли́твами поми́луй нас.

А́нна смиренному́дренная, Гаврии́ла му́ченика ма́ти, со отце́м его́ Петро́м трудолюби́вым сле́зы на ра́дость преложи́ша, своего́ отроча́те уви́девше неувяда́емую сла́ву.

Богоро́дичен: Жезл Ааро́нов прозя́бший, и́же от Иессе́я прообража́ше изра́стший ко́рень, Тя, Пречи́стую, цвет ми́ру возсия́вшую. Бо́га воплоще́нна, Его́же о нас моля́щи не преста́й, Присноде́во, прибега́ющих к Тебе́.

Песнь 3

Ирмо́с: Я́ко непло́ды роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свят еси́ Го́споди.

Добро́ бы́ло бысть вам не роди́тися, нечести́вии мучи́телие, зане́ отра́днее бу́дет Содо́му и Гомо́рру в День Су́дный, не́же Христо́ва испове́дника уби́йцем. Того́ моли́твами, Го́споди, утверди́ правосла́вных ве́ру.

Егда́ подписа́ние, е́же о твое́м муче́нии, от иуде́ев бы́вшем, му́чениче, сотвори́ша судии́ заблу́довстии, тогда́ исте́рзанное те́ло твое́ земле́ благоче́стно преда́ша лю́дие. Но проше́дшим три́десятим ле́том то́ежде тле́нию неприча́стно обрето́ша и Госпо́дне о тебе́ промышле́ние просла́виша.

Ни́щим и оби́димым близ есть Госпо́дь: Той бо, от ни́щих роди́телей отъя́ти ча́до попусти́в нечести́вым, па́че царе́й земны́х безча́дныя прославля́ет, зане́ и ца́рие и святи́телие тех отроча́ти моли́твенно преклоня́ют коле́на.

Богоро́дичен: Я́ко но́сиши на руку́, Мари́е, и от сосцу́ пита́еши Пита́ющаго вся́кое дыха́ние, Его́же, Богоро́дице, чту́ще, пропове́даем: моли́ся Ему́, Чи́стая, о всех нас.

 

Конда́к и и́кос пра́здника.

Седа́лен свята́го, глас 8:

О, какова́я муче́ния твоя́, отроча́, Бо́гу возлю́бленное! О, какова́я терпе́ния твоего́ кре́пость, избоде́ние бо, и ме́дленное кро́ве испуща́ние, и пло́ти твоея́ раздира́ние за Христа́ прия́л еси́, но Того́ ра́ди засту́пник о стра́ждущих младе́нцех у Христа́ Бо́га явля́ешися, ма́тери твоея́, обезча́дствованней бы́вшей, всем ма́терем, о ча́дех моля́щимся, уте́шитель быва́вши и мо́лишися при́сно о спасе́нии душ на́ших.

Сла́ва, и ны́не, пра́здника.

 

Песнь 4

     Ирмо́с: Услы́шах Твое́, Христе́, вои́стинну пресла́вное, я́ко безсме́ртен сый Бог уподо́бися сме́ртным челове́ком и пребы́сть, е́же бе, и того́ ра́ди Твою́ сла́влю си́лу.

     Царе́м и мучи́телем преклони́ша вы́и своя́ на убие́ние дре́внии му́ченицы, тех подо́бник бысть Гаврии́л младе́нец, кровь свою́ непови́нную на истерза́ние отда́в иуде́ом жестокосе́рдым. Го́споди, того́ моли́твами вложи́ ре́вность о сла́ве Твое́й в ду́ши на́ша.

      А́ще и в те́мней погребни́це заключи́ша тебе́ иуде́е, о му́чениче, а́ще и стра́шными му́ками тебе́ умертви́ша, но а́бие во све́тлый черто́г Госпо́день дух твой, ра́дуяся, всели́ся, иде́же со А́нгелы о сла́ве Госпо́дней днесь лику́ет.

     Ми́лостив   бу́ди к мои́м не́мощем, му́чениче святы́й Гаврии́ле, моего́ малоду́шия не возгнуша́вся, проще́ние ми от Го́спода испроси́, и́же себе́ за ве́ру Его́ не пощади́вый и в младе́нчестем телеси́ Того́ просла́вивый.

     Богоро́дичен: Тебе́, Присноде́вую и вои́стинну еди́ну Богоро́дицу, сла́вим, Ю́же прообразова́ше Богови́дцу Моисе́ю неопа́льно, Пречи́стая, купина́, огню́ примеси́вшаяся.

              

Песнь 5

Ирмо́с: Просвеще́ние Твое́, Го́споди, низпосли́ нам и от мглы прегреше́ний разреши́ ны, Бла́же, Твой мир да́руяй.

     О́браз злострада́ния Гаврии́лова прии́мем, бра́тие, и своего́ о ве́ре нераде́ния устыди́мся, от убива́ющих те́ло не убои́мся, но Иму́щему власть по убие́нии в гее́нну о́гненную вве́ргнути, Тому́ со стра́хом повини́мся, страстоте́рпца свята́го в по́мощь призыва́юще.

      Лю́та есть му́ка, но сла́док рай, боле́зненно на земли́ безча́дие, но неисчерпа́емо утеше́ние на́ше,– роди́теля  Гаврии́лова взыва́ху,– от земны́х бо печа́лей ча́до на́ше к ве́чной ра́дости пресели́ся.

      Иже о боле́знех и му́ках чад свои́х скорбя́ще, роди́телие, с ве́рою ко гро́бу Гаврии́лову припади́те, есть бо засту́пник о них пред Христо́м, я́ко кровь свою́ за испове́дание и́стинныя ве́ры излия́вый.

Богоро́дичен: Мучи́телей ра́зум де́вственное посрами́ чре́во: Младе́нец бо я́зву а́спидную душегу́бную испыта́ руко́ю и, отсту́пника го́рдаго низложи́в, ве́рным под но́зе покори́.

Песнь 6

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли изба́ви мя, Иису́се, Царю́ сил.

Твои́х раб моле́ния не отве́ржи, младе́нче прему́дре, твое́ю сла́вою умиля́ющихся и твоя́ по́двиги со умиле́нным се́рдцем воспева́ющих, а́ще терпе́ния твоего́ не стяжа́вших, но испра́вити житие́ свое́ жела́ющих.

Вся́ческих сокро́вищ, и́миже земля́ украша́ется: зла́та, и би́сера, и ка́мений многоце́нных, честне́йша суть святы́х уго́дников нетле́нныя мо́щи, и́ми бо благода́тная си́ла Бо́жия де́йствует, сию́ у́бо нам испроси́, уго́дниче Христо́в, во исцеле́ние душ и теле́с на́ших.

А́ще и мно́гая гоне́ния правосла́внии христиа́не от иуде́й и от ерети́к прия́ша, о́крест сла́вныя оби́тели твоея́ живу́щии, оба́че стоя́ние твое́ о и́стинней ве́ре вспомина́юще, от прославле́ния и́стиннаго Бо́га и твоего́ предста́тельства ника́коже отпадо́ша.

Богоро́дичен: Дре́вле у́бо прельсти́ мя змий и умори́ мя прама́терию мое́ю Е́вою, ны́не же, Чи́стая, Тобо́ю Созда́вши мя из истле́ния воззва́л есть.

Конда́к, глас 6:

   Оте́чество твое́ Зверки́ бысть, му́чениче Христо́в Гаврии́ле, иде́же от и́стых звере́й — иуде́ев восхище́н: а́бие роди́телей лише́н еси́, та́же вся поря́ду лю́те претерпе́в, в оте́чество Небе́сное пресели́лся еси́. Восхища́й и нас зде от вся́ких напа́стей и скорбе́й и умоли́, мо́лим тя, улучи́ти ве́чное насле́дие твое́.

Икос:

    Просла́вим, бра́тие, Гаврии́ла младе́нца, о Христе́ злострада́ния прия́вшаго, той бо, я́ко ягня́ незло́бивое, льсти́вому иуде́ю после́довав, из до́ма о́тча восхище́н бысть и в те́мную погре́бницу вве́ржен, ужа́сная же терза́ния и избоде́ние пло́ти своея́ прете́рпев надо́лзе, я́ко же́ртва чи́стая Тро́ице принесе́ся и мно́гая заступле́ния о моля́щихся ему́ чрез мно́гая ле́та показу́ет, вся приходя́щия в це́рковь его́ зра́ком нетле́ннаго телесе́ своего́ умиля́я. Тому́ у́бо возопии́м: умоли́, мо́лим тя, улучи́ти и нам ве́чное насле́дие твое́.

Песнь 7

Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Ма́терей скорбя́щих уте́шителю, младе́нцев боля́щих цели́телю, Гаврии́ле, уго́дниче Христо́в, ду́шу мою́, скорбя́щую о гресе́х свои́х, уте́ши и исцели́ и сию́ над пло́тию госпожу́ моли́твою твое́ю соде́лай, своея́ пло́ти Христа́ ра́ди не пощади́вый.

Или́ не разуме́ете, нечести́вии иуде́и, я́ко Бо́га оте́ц ва́ших врага́ себе́ соде́ловаете, Того́ созда́ние непови́нное лю́те терза́юще и сицевы́м дея́нием приноси́ти ему́ слу́жбу мня́ще, безу́мнии. Го́споди, Гаврии́ла моли́твами чад их сердца́ умягчи́  и сердца́ на́ша от сицевы́я лю́тости изба́ви.

Слуцк град вои́стинну блаже́н есть, та́мо бо проше́дшим пяти́десятим шести́м ле́том положи́ся му́ченика Гаврии́ла нетле́нное те́ло, та́мо до днесь сле́зы, моли́твы и благодаре́ния пред гро́бом его́ от ма́терей о ча́дех свои́х излива́ются и всех ве́рующих прие́млются моле́ния.

Богоро́дичен: Превы́шши тва́рей всех еси́, я́ко Творца́ ро́ждши и Го́спода. Те́мже Ти вопию́, Богоро́дице: Благослове́нная, Госпо́дь сил с Тобо́ю.

 

Песнь 8

Ирмо́с: Ра́дующеся по осужде́нии мучи́тельстем о́троцы, я́ко да не бого́м скве́рным послу́жат всем, но Живо́му Бо́гу, на о́гнь дерзну́ша, от А́нгела же ороша́еми, песнь поя́ху: дела́ Госпо́дня, Го́спода по́йте и превозноси́те во вся  ве́ки.

Пти́цы сыроя́дцы, над исте́рзанным те́лом му́ченика ре́юще, и пси гла́днии, сия́ отража́юще и те́ло му́ченика храня́ще, обличи́телие злодея́ния  иуде́йскаго яви́шася, сла́вы же свята́го неми́и пропове́дницы.

А́ще и зве́рие гла́да своего́ о свято́м телесе́ утоли́ти не дерзну́ша, ка́ко у́бо зло́ба иуде́ев тем насыща́шеся? Ка́ко ти́и, чу́до зря́ще, не покая́шася? Зри, о душе́ моя́, сих ожесточе́ние, и ужасни́ся, и свято́му сему́ помоли́ся, да от вся́кия зло́бы тебе́ вы́ну огражда́ет.                        

Сле́зы умиле́ния о по́двизе и о сла́ве младе́нца и му́ченика пролива́юще, бра́тие, своего́ окая́нства воспла́чим и своего́ нераде́ния устыди́мся: а́ще бо та́ко Бо́гу угоди́ младе́нец ма́лый, почто́ мы, му́жие, су́ще о сем небрего́хом?

Богоро́дичен: От ребра́ Ада́мова созда́вый Тя, от Твоего́ де́вства воплоти́ся, Иже всех Госпо́дь, Его́же пою́ще, вопие́м: вся дела́, благослови́те, по́йте Го́спода и превозноси́те во вся ве́ки.

Песнь 9

Ирмо́с: От земноро́дных ро́ждшися и Творца́ ро́ждшая, на́ша похвало́, Богоро́дице Чистая, Тя, я́ко влады́чествующую тва́рьми, велича́ем.

И ны́не, уго́дниче Бо́жий Гаврии́ле, о наро́де росси́йстем бу́ди пред Го́сподом предста́тель, я́коже дре́вле: тогда́ бо от иуде́й и ерети́к муче́ния христиа́не приима́ху, ны́не же от обою́ собла́зном вдаю́тся лю́те, те́мже твоего́ стоя́ния да́руй нам па́мять и о подража́нии тебе́ ре́вность благу́ю.

Мы́сленнаго уби́йцу души́ моея́, сию́ поглоти́ти и́щуща, побежда́ти помози́ ми. Бо́жий уго́дниче, те́ло свое́ на истерза́ние преда́вый, но ду́шу свою́ непоро́чну от тех устраше́ния сохрани́вый и Христу́, а́ки дар че́стен, страда́ния своя́ принесы́й и сего́ ра́ди от Него́ благода́ть прия́вый, во е́же моли́твы на́ша Престо́лу сла́вы Его́ при́сно возноси́ти.                         

Я́звы, на твое́ младе́нческое те́ло от иуде́й возложе́нныя, я́звы врагу́ спасе́ния на́шего яви́шася, де́монов победи́телю, Гаврии́ле блаже́нне, от и́хже мучи́тельства изба́ви ду́ши на́ша и над тех искуше́ний победи́тели предста́тельством твои́м яви́ нас.

Богоро́дичен: От земноро́дных возра́стши и Зижди́теля ро́ждши, ра́дуйся, на́ша похвало́, Богоро́дице Чи́стая, Тя, я́ко облада́ющую тва́рьми, велича́ем.

           Свети́лен.

Подо́бен: Пло́тию усну́в:

Плоть на растерза́ние иуде́ом вда́вшаго, дух же свой Бо́гу преда́вшаго, днесь воспои́м во младе́нцех му́ченика, того́ приводя́ще в моли́тву о умире́нии Це́ркви и о спасе́нии душ на́ших.

Сла́ва, и ны́не, пра́здника.

На хвали́тех стихи́ры пра́здника 3 и свята́го 3, глас 5:

Ра́дуйся, младе́нцев похвало́ пресла́вная; ра́дуйся, му́чеников соприча́стниче и росси́йскаго наро́да сла́во пречестна́я, от те́мныя погре́бницы просия́вшая и правосла́вных сердца́ просвети́вшая. Ра́дуйся, моли́тв матере́й скорбя́щих ско́рый слы́шателю; ра́дуйся, двоеду́шных челове́к молчали́вый обличи́телю. Помози́ у́бо нам, пра́ведниче Бо́жий, за святу́ю ве́ру кре́пко подвиза́тися и моли́тву сотвори́ о спасе́нии душ на́ших.

    Ра́дуйся, чуде́с источниче, сам же чу́до долготе́рпения яви́выйся; ра́дуйся, младе́нческую чистоту́ с му́жеством му́ченика сочета́вый и иуде́йское злоче́стие посрами́вый. Ра́дуйся, Росси́йстей стране́ сокро́вище неоцене́нное в твои́х святы́х моще́х дарова́вый и моле́ние те́плое ко Христу́ вознося́й о умире́нии ми́ра, и Церкве́й  стоя́нии, и о спасе́нии душ на́ших.

    Ра́дуйся, сердца́ всех челове́ков умиля́яй; ра́дуйся,   твои́м   мучи́тельскому   наси́льству противле́нием и хла́дныя ду́ши покая́нием сокруша́яй. Ра́дуйся, смире́нных се́рдцем и ни́щих утеше́ние, и младе́нцев непосты́дное упова́ние, и и́ноков Ева́нгельскому младе́нчеству учи́телю, и моли́твенниче о душа́х на́ших.

Сла́ва, глас 2:

    Страсте́й Христо́вых седми́цу соверша́ющим христиа́ном и ду́ши своя́ ко сре́тению Святы́я Па́схи приуготовля́ющим, Гаврии́л младе́нец от иуде́й страсть приима́ше и, на стене́ погре́бницы те́мныя распина́емый за ра́спятаго Спа́са, кровь свою́ излива́ше, прише́дшу же дню Госпо́дня Воскресе́ния дух его́ ко Христу́ в Небе́сная селе́ния отъи́де, плоть же его́ иуде́и вне гра́да изверго́ша, но сия́, нетле́нна пребыва́ющи, да́же до днесь о́бщее воскресе́ние пропове́дует и уго́дника умоля́ти нас науча́ет, да мо́лится непреста́нно о душа́х на́ших.

 

И ны́не, пра́здника.

Славосло́вие вели́кое. И отпу́ст.

 НА ЛИТУРГИИ

Блаже́нны от кано́на пра́здника песнь рядова́я и свята́го песнь 3-я. Проки́мен, глас 4: Из уст младе́нец и ссу́щих соверши́л еси́ хвалу́. Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь. Апо́стол, зача́ло 58 от полу́. Бра́тие, отложи́вше вся́ку зло́бу и лесть: Коне́ц:

Ны́не поми́ловани бы́сте. Ева́нгелие от Матфе́я, зача́ло 74. Прича́стен: Из уст младе́нец и ссу́щих соверши́л еси́ хвалу́.

ЗРИ А́ще случи́тся па́мять свята́го Гаврии́ла младе́нца во святы́й и велики́й вто́рник, или́ в вели́кую сре́ду, или́ в четверто́к, и пое́м слу́жбу его́ в неде́лю Ва́ий, я́коже в Ти́пице, во главе́ о хра́мех показа́ся. А́ще ли бу́дет па́мять его́ в вели́кий пято́к, или́ в суббо́ту, или́ в са́мый святы́й день Па́схи, и пое́м слу́жбу его́ в понеде́льник Па́схи; а́ще ли в той понеде́льник бу́дет па́мять свята́го Гео́ргия Победоно́сца, и пое́м слу́жбу свята́го Гаврии́ла во вто́рник Па́схи. Про́чее же пое́м его́ слу́жбу по уста́ву дне свята́го Гео́ргия Победо́носца, и́же есть в 23-й день ме́сяца апре́ля. Сие́ же разуме́й, я́ко иде́же указа́ся кано́н, или́ стихи́ра, или́ тропа́рь ре́кше пра́здника, несть у́бо се пра́здник са́мыя святы́я Па́схи, но по Трио́ди дне того́, сие́ есть седми́чнаго дне Антипа́схи или́ Мироно́сиц, или́ разсла́бленнаго, или́ Преполове́ния, в о́ньже день обря́щеши в Трио́ди подоба́ющия стихи́ры, и кано́ны, и седа́льны.

    А́ще ли бу́деши пе́ти слу́жбу свята́го Гаврии́ла, кроме́ Пятидеся́тницы или́ неде́ли цветоно́сия, во ин день го́да, и тогда́ вме́сто кано́на пра́здника глаго́ли кано́н Богоро́дицы от Окто́иха настоя́щаго гла́са и Богоро́дичны воскре́сны стихи́р, и седа́льнов, и тропаре́й и свети́льна в то́йже глас, то́чию на Го́споди, воззва́х: Богоро́дичен пе́рвый настоя́щаго гла́са. А́ще ли бу́дет ко́е-ли́бо попра́зднство, то па́ки ин уста́в обря́щеши, ка́ко подоба́ет тогда́ пра́вити па́мять свята́го, иму́щаго полиеле́й или́ бде́ние: есть бо сему́ о́браз января́ в 11-й день на па́мять преподо́бнаго Феодо́сия Вели́каго и попра́зднства Богоявле́ния. То́жде и в гла́вах Типико́на о хра́мех обря́щеши.

Моли́тва

     Младе́нческаго незло́бия храни́телю и му́ченическаго му́жества носи́телю, Гаврии́ле блаже́нне, страны́ на́шея адама́нте драгоце́нный и иуде́йскаго нече́стия обличи́телю! К тебе́ мы, гре́шнии, моли́твенно прибега́ем и, о гресе́х свои́х сокруша́ющеся, малоду́шия же своего́ стыдя́щеся, любо́вию зове́м ти: на́ших скверн не возгнуша́йся, чистоты́ сый сокро́вище, на́шего малоду́шия не омерзи́, долготе́рпения учи́телю, но па́че сих, не́мощи на́ша от Небе́с ви́дя, тех исцеле́ния нам твое́ю пода́ждь моли́твою и твоея́ Христу́ ве́рности подража́тели нас бы́ти научи́. А́ще ли терпели́вно крест искуше́ний и злострада́ний понести́ не возмо́жем, оба́че и тогда́ ми́лостивыя твоея́ по́мощи не лиши́ нас, уго́дниче Бо́жий, но свобо́ду и осла́бу нам у Го́спода испроси́. Та́же и моля́щияся о ча́дех свои́х ма́тери услы́ши, здра́вию и спасе́нию младе́нцем от Го́спода пода́тися умоля́яй. Несть такова́го жесто́каго се́рдца, е́же слы́шанием о му́ках твои́х, святы́й младе́нче, не умили́тся, и а́ще кроме́ сего́ умиле́ннаго воздыха́ния никоего́же блага́го дея́ния принести́ возмо́жем, но и таковы́м умиле́нным по́мыслом на́ши умы́ и се́рдце, блаже́нне, просвети́в, на исправле́ние жития́ на́шего благода́тию Бо́жиею нас наста́ви. Вложи́ в нас о спасе́нии души́ и о сла́ве Бо́жией ре́вность неуста́нную и о ча́се сме́ртнем па́мять неусы́пную храни́ти помози́ нам. Наипа́че же в сме́ртнем успе́нии на́шем терза́ния де́монская и по́мыслы отча́яния от душ на́ших предста́тельством твои́м отжени́ и сия́ упова́нием Боже́ственнаго проще́ния испо́лни, во е́же и тогда́ и ны́не сла́вити нам милосе́рдие Отца́, и Сы́на, и Свята́го Ду́ха и твое́ кре́пкое заступле́ние во ве́ки веко́в. Ами́нь.

 


* триста́ты военачальники

Распечатать Распечатать

Комментирование закрыто.