Служба святителя Кирилла, епископа Туровскаго

(28 апре́ля / 11 ма́я)

 

На ма́лой вече́рни

На Го́споди, воззва́х стихи́ры, глас 8:

О́тче наш Кири́лле богому́дре, от ю́ности Боже́ст­венному уче́нию прилежа́л еси́, и плоды́ досто́йны Христу́ Царю́ прине́сл еси́, Те́мже преукра́шен сла́вы венце́м возше́л еси́ в небе́сныя оби́тели.

О́тче наш Кири́лле преподо́бне, доброде́тельным мона́шеским житие́м Бо́гу угоди́л еси́, и я́коже дре́вния подви́жницы, на столп возше́д, затвори́лся еси́, моля́ся О́тцу Небе́сному о спасе́нии ми́ра.

О́тче наш святи́телю Кири́лле, послуша́ния ра́ди благода́ть епи́скопства восприя́л еси́, па́ству Ту́ров­скую от бед и напа́стей до́бре сохрани́л еси́ и от раз­до́ров Це́рковь Ру́сскую изба́вил еси́ свои́ми наставле́ньми и поуче́ньми.

О́тче наш Кири́лле богосве́тле, благоче́стием сво­и́м просия́л еси́, и я́ко со́лнце пра́вды нече́стия и язы́чества тьму́ отгна́л еси́, и всю страну́ на́шу про­свети́л еси́, науча́я златы́ми словесы́ свои́ми сла́вити Тро́ицу Единосу́щную.

Сла́ва, глас то́йже:

Освяще́нный Боже́ственным Ду́хом, я́ко чи́стый сосу́д  духо́внаго  ми́ра,  благоуха́ние  источа́еши  всем ве́рным, прехва́льне святи́телю наш Кири́лле, земли́ Белору́сския сла́во и украше́ние, моли́ о всех, любо́вию чту́щих па́мять твою́.

И ны́не, пра́здника.

 

На стихо́вне стихи́ры, глас 2.

Подо́бен: До́ме Евфра́фов:

Яви́лся еси́ земли́ Ту́ровския о́трасль блага́я, и со­су́д освяще́н, Кири́лле, и жили́ще Пресвята́го Ду́ха.

Стих: Свяще́нницы Твои́ облеку́тся в пра́вду, и преподо́бнии Твои́ возра́дуются.

Ра́дуйся, святи́телей похвало́, о́тче Кири́лле, свя­ще́нников сла́ва, пра́вило мона́хов, Це́ркве Ру́сския утвержде́ние.

Стих: Блаже́н муж, боя́йся Го́спода, в за́поведех Его́ восхо́щет зело́.

Приими́ пе́ние ны́не чад твои́х, о́тче, и лю́бящим тя́ подава́й серде́чная проше́ния.

Сла́ва, глас то́йже:

Небе́снаго Царя́ Престо́лу со а́нгельскими чи́нми предстоя́, о́тче Кири́лле, моли́ о чту́щих и прослав­ля́ющих тя.

И ны́не, Богоро́дичен:

Небе́снаго   Царя́   Ма́ти, Небе́снаго  Иерусали́ма жи́телей бы́ти сподо́би нас и сла́дости таковы́я получи́ти, ея́же жела́ет ви́дети о́ко а́нгельское.

По Ны́не отпуща́еши: тропа́рь (зри́ на вели́цей вече́рни).

 

На вели́цей вече́рни

На Го́споди, воззва́х стихи́ры, глас 2:

Ки́ими похва́льными венцы́ венча́ем златослове́снаго Кири́лла? Земли́ на́шея чу́дное прозябе́ние и доброде́телей мног пло́д благослове́н, чистоту́ жития́ возлю́бльшаго и равноа́нгельно пожи́вшаго, и́ноков наста́вника и благоче́стия ревни́теля, земна́го а́нгела, небе́снаго челове́ка, его́же ра́ди святы́х моли́тв вра­го́в Це́ркве Христо́с Бо́г низложи́, име́яй ве́лию ми́­лость.

Ки́ими пе́сенными похвала́ми просла́вим богому́драго отца́ на́шего Кири́лла? Преподо́бным ли́ком со­прича́стника и сто́лпником сожи́теля, под святы́м по­кро́вом страстоте́рпцев благове́рных князе́й Бори́са и Гле́ба в мона́шеских по́двизех просия́вшаго и наставле́ньми свои́ми бра́тию умудри́вшаго, смире́нию и по­кая́нию всех учи́вшаго, его́же стезя́ми ходи́ти и на́с, Христе́ Бо́же, напра́ви, по вели́цей Твое́й ми́лости.

Ки́ими проро́ческими пе́сньми похва́лим святи́те­ля пресла́внаго на́шего Кири́лла? Архиере́ем бы́ти Про́мыслом Бо́жиим предызбра́ннаго, и на ка́федру Ту́ровскую кня́зем и людьми́ возведе́ннаго, храм чу́д­ный в сла́ву Святы́я Тро́ицы воздви́гшаго, хода́тая непреста́ннаго за па́ству свою́ пред Пречи́стою и Не­бе́сными чи́нми, и́хже ра́ди моле́ний гра́ду на́шему и всей стране́ Госпо́дь дае́т ве́лию ми́лость.

Ки́я похвалы́ и да́ры духо́вныя принесе́м златоу́стому учи́телю всея́ Руси́ Кири́ллу? О́нже ны́не со А́нгелы и со все́ми святы́ми за род христиа́нский пред Престо́лом Бо́жиим мо́лится, дарова́ти стране́ на́шей мир, Це́ркви Правосла́вной утвержде́ние и единомы́слие, архиере́ем и́стинное согла́сие, власте́м благо́е вразумле́ние, во́инству благоче́стие и на враги́ побе́ду, лю́дем покая́ние и страсте́й свобожде́ние, земли́ благопло́дие и душа́м на́шим ве́лия ми́лости.

Сла́ва, глас 8:

Яви́ся дне́сь пресве́тлая па́мять святи́теля на́шего Кири́лла, я́ко со́лнце над земле́ю Поле́сскою я́рко си­я́ющее и благода́ти луча́ми нас согрева́ющее, к ре́в­ности по Бо́зе зову́щее всех, с ве́рою и любо́вию при­ше́дших на сие́ све́тлое то́ржество.

И ны́не, пра́здника.

 

Вход. Проки́мен дне. Чте́ния три.

 

При́тчей чте́ние (главы́ 10, 3 и 8):

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же есть ка́мений многоце́нных, все же честно́е недосто́йно ея́ есть. Долгота́ бо дней и ле́та живота́ в десни́це ея́, в шу́йце же ея́ бога́тство и сла́ва; от уст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да! честна́я бо реку́, и блаже́н челове́к, и́же пути́ моя́ сохрани́т, исхо́ди бо мои́ – исхо́ди живота́, и уготовля́ется хоте́ние от Го́спода. Сего́ ра́ди молю́ вас и предлага́ю мой глас сыново́м челове́ческим, я́ко аз, прему́дрость, устро́их сове́т, и ра́зум и смысл аз призва́х. Мой сове́т и утвержде́ние, мой ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́заннии же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси глаго́лы уст мои́х, ничто́же в них стро́потно, ниже́ развраще́нно. Вся пра́ва суть разумева́ющим, и про́ста обрета́ющим ра́зум. Науча́ю бо вас и́стине, да бу́дет о Го́споде наде́жда ва́ша, и испо́лнитеся Ду́ха.                       

 

Прему́дрости Соломо́новы чте́ние (главы́ 10, 6, 8 и 9):

Уста́ пра́веднаго ка́плют прему́дрость, устне́ же муже́й му́дрых ве́дят благода́ть. Уста́ му́дрых поуча́тся прему́дрости, пра́вда же избавля́ет их от сме́рти. Сконча́вшуюся му́жу пра́ведну, не поги́бнет наде́жда. Сын бо пра́веден ражда́ется в живо́т: и во благи́х свои́х плод пра́вды обы́мет. Свет пра́ведным всегда́, и от Го́спода обря́щут благода́ть и сла́ву. Язы́к му́дрых до́брая свесть, и в се́рдце их почи́ет му́дрость. Лю́бит Госпо́дь преподо́бная сердца́, прия́тни же Ему́ вси непоро́чнии в пути́. Му́дрость Госпо́дня просвеща́ет лице́ разу́мнаго. Постига́ет бо  жела́ющия ю, пре́жде да́же разуме́ти ю, и удо́бь у́зрится от лю́бящих ю. У́треневавый к ней не утруди́тся: и бдяй ея́ ра́ди, вско́ре без печа́ли бу́дет. Я́ко досто́йных ея́ сама́ обхо́дит, и́щущи, и во стезя́х ея́ явля́ется им благоприе́мне. Му́дрости никогда́ же одоле́ет зло́ба. Сих ра́ди и рачи́тель бых добро́ты ея́, и возлюби́х ю, и поиска́х от ю́ности моея́. И взыска́х неве́сту привести́ себе́, я́ко всех Влады́ка возлюби́ ю, таи́нница бо есть Бо́жия хи́трости и обрета́тельница дел Его́. Труды́ ея́ суть доброде́тели, целому́дрию же и ра́зуму та учи́т, пра́вде и му́жеству, и́хже потре́бне ничто́же есть в житии́ челове́ком. А́ще же и мно́гаго иску́сства жела́ет кто, весть дре́вняя и бы́ти хотя́щая разсмо́трит. Свесть изви́тия слове́с и разреше́ния гада́ний, зна́мения и чудеса́ проразуме́ет и сбытия́ време́н и лет, и всем сове́тник есть благ, я́ко безсме́ртие есть в ней и благосла́вие во обще́нии слове́с ея́. Сего́ ра́ди бесе́довах ко Го́споду, и помоли́хся Ему́, и рех от всего́ сердца́ моего́: Бо́же отце́в и Го́споди ми́лости, сотвори́вый вся сло́вом Твои́м и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет мир в преподо́бии и пра́вде. Даждь ми Твои́х престо́лов приседя́щую прему́дрость и не отлучи́ мене́ от о́трок Твои́х, я́ко аз раб Твой и сын рабы́ни Твоея́. Посли́ ю с небе́с от свята́го жили́ща Твоего́ и от престо́ла сла́вы Твоея́, да, су́щи со мно́ю, научи́т мя, что благоуго́дно есть пред Тобо́ю. И наста́вит мя в ра́зум, и сохрани́т мя в сла́ве свое́й. Помышле́ния бо сме́ртных вся боязли́ва и погреши́тельна умышле́ния их.

 

Прему́дрости Соломо́новы чте́ние (главы́ 4, 6, 7 и 2):

Похваля́емому пра́веднику возвеселя́тся лю́дие: безсме́ртия бо есть па́мять его́, я́ко от Го́спода познава́ется и от челове́к, и уго́дна Го́сподеви душа́ его́. Возлюби́те у́бо, о му́жие, му́дрость и поживете́, восхощи́те ея́ и нака́зани бу́дете. Нача́ло бо ея́ любы́, и соблюде́ние зако́на, почти́те прему́дрость, да во ве́ки ца́рствуете. Возвещу́ вам и не скры́ю от вас та́йн Бо́жиих, я́ко Той му́дрости Наста́вник есть, и му́дрых Испра́витель, и вся́кому смы́слу и де́лу Хитре́ц. И всем смы́слом научи́т му́дрость, есть бо в ней Дух Разу́мен и Свят, и сия́ние Све́та Присносу́щнаго, и о́браз бла́гости Бо́жия. Та дру́ги Бо́жия и проро́ки устроя́ет, благоле́пнейши же есть со́лнца и па́че вся́каго сотворе́ния звезд, све́ту сосужда́ема, обрета́ется пе́рвейши. Та угожда́ющих ей от боле́зней изба́ви и наста́ви на стези́ пра́выя. Даде́ им ра́зум име́ти свят, и сохрани́ я от ловя́щих, и по́двиг кре́пок подаде́ им. Да разуме́ют вси, я́ко си́льнейши всего́ есть благоче́стие, и никогда́же премо́жет зло́ба му́дрости, ниже́ пре́йдет злы́я, облича́ющи суд. Реко́ша же в себе́, помы́сливше непра́ведно: наси́льствуем пра́ведному, не пощади́м преподо́бства его́, ни усрами́мся седи́н ста́рости многоле́тны. Бу́дет бо нам кре́пость зако́н, и улови́м пра́веднаго, я́ко неуго́ден нам есть, и проти́вится дело́м на́шим, и поно́сит нам отпаде́ние зако́на, и облича́ет нам согреше́ния наказа́ния на́шего. Возвеща́ет нам ра́зум име́ти Бо́жий и о́трока Госпо́дня себе́ имену́ет. Бысть нам на обличе́ние помышле́нием на́шим, и тя́жек нам есть, и ви́дим я́ко неподо́бно ины́м житие́ его́ и измене́ны стези́ его́. В поруга́ние вмени́хомся ему́, и удаля́ется от путе́й на́ших, я́ко от нечисто́т, и блажи́т после́дняя пра́ведных. Уви́дим у́бо, а́ще словеса́ его́ и́стинна суть, иску́сим, я́же сбыва́ются ему́. Руга́нием и му́кою истя́жем его́, да разуме́ем кро́тость его́ и иску́сим беззло́бство его́, сме́ртию безобра́зною осу́дим его́, бу́дет бо посеще́ние от слове́с его́. Сия́ помы́слиша и прельсти́шася, ослепи́ бо я зло́ба их, и не разуме́ша тайн Бо́жиих, и не разсуди́ша, я́ко Ты еси́ Бог Еди́н, живота́ име́яй и сме́рти власть, и спаса́яй во вре́мя ско́рби, и избавля́яй от вся́каго зла. Щедр, и ми́лостив, и дая́ преподо́бным Свои́м благода́ть, и Свое́ю мы́шцею  го́рдым противля́яйся.

 

На литии́ стихи́ры, глас 1:

Неувяда́емым венце́м венча́лся еси́ от руки́ Вседер­жи́теля Бо́га, святи́телю наш о́тче Кири́лле, сего́ ра́­ди и мы и́мамы тебе́, вели́каго хода́тая пред Го́сподом, Его́же усе́рдно ны́не моли́ по́двигом до́брым нам подвиза́тися и Ве́ру Правосла́вную в чистоте́ соблюсти́.

Святи́телю Кири́лле, уста́ златосия́нная, ты пре­чи́стое Всесвята́го Ду́ха сокро́вище в земли́ Ру́сстей был еси́, отню́дуже возвесели́л еси́ спаси́тельным тво­и́м сло́вом, дерзнове́ние у́бо обре́т к Бо́гу, в наслаж­де́нии го́рняго насле́дия моли́ся о нас, о́тче священ­не́йший.

Излия́ся благода́ть во устна́х твои́х, преподо́бне о́т­че, и сего́ ра́ди пома́за тя Госпо́дь архиере́ем бы́ти лю́дем гра́да вели́каго на При́пяти и учи́ти па́ству Ту́ровскую благоче́стию и пра́вде. Те́мже, препоя́сан ору́жием Си́льнаго, пресе́кл еси́ язы́ческое нече́стие, и ны́не не преста́й моля́ся умири́ти мир и спасти́ ду́­ши на́ша.

Сла́ва, глас 6:

Прииди́те, ве́рнии, в хра́мы Бо́жии, та́м бо ны́не возно́сится сла́ва в вы́шних живу́щему па́стырю до́б­рому и святи́телю Кири́ллу, соверша́ющим же память его́ то́й проше́ния во все́м исполня́ет, и от напа́стей и бе́д избавля́ет, и спаса́ет свои́ми моли́твами.

И ны́не, пра́здника.

 

На стихо́вне стихи́ры, глас 6.

Подо́бен: Тридне́вен:

Святи́телю богому́дре Кири́лле, разу́мнаго све́та заре́, церко́вное свети́ло, святи́телей похвало́, красо­те́ и́ноческаго жития́ и и́стинное по́стников пра́вило, засту́пниче наш пред Го́сподом, от ко́зней вра́жиих нас свобожда́й.

Стих: Уста́, пра́веднаго поуча́тся прему́дрости, и язы́к его́ возглаго́лет суд.

Святи́телю сла́вне Кири́лле, наста́вниче доб­роде́телей, гра́да Ту́рова о́трасле пресла́вная, приле­жа́ния в уче́нии ю́ным о́бразе, гро́зный ересе́й обли­чи́телю, моли́твою твое́ю и нас укрепля́й.

Стих: Уста́ моя́ возглаго́лют прему́дрость, и по­уче́ние се́рдца моего́ ра́зум.

Святи́телю наш Кири́лле, со́лнца сия́ние пра́вед­ное, земли́ Белору́сския храни́телю, власте́м и кни́ж­никам путю́ к И́стине, ми́ра златоу́стый учи́телю, сло́вом свои́м к спасе́нию нас направля́й.

Сла́ва, глас 2:

Тя, вели́каго архиере́я и па́стыря, незло́бива и пре­подо́бна, покая́ния пропове́дника, сло́ва Бо́жия ри́тора златоу́стаго, восхваля́юще с любо́вию мо́лимся: пода́ждь нам не́мощным благода́тное укрепле́ние и в жи­тии́ духо́вное наставле́ние.

И ны́не, пра́здника.

 

По Ны́не отпуща́еши тропа́рь свято́му, два́жды, и пра́здника: еди́ножды.

Тропа́рь, глас 4:

Благоче́стия ревни́телю и рачи́телю, и́ноков и сто́лпников похвало́, святи́телю Ту́ровския па́ствы пресла́вне, златослове́сный учи́телю, све́тлым уче́­нием богоразу́мия своего́ просвети́вый концы́ ру́сския, в моли́тве к Бо́гу благода́тный гре́шников споспе́шниче, Кири́лле богому́дре, моли́ Христа́ Бо́га утверди́тися на́м, сооте́чественником твои́м, во Пра­восла́вии, благоче́стии и единомы́слии.

 

На у́трени

По 1-м стихосло́вии седа́лен, глас 4:

Прииди́те торжеству́ем све́тло, пра́зднующе па́мять преподо́бнаго Кири́лла, святи́теля земли́ Ту́ровския, сей па́стырь до́брый ны́не зрит добро́ту неизрече́нную оби́телей го́рних, та́мо со апо́столы и му́ченики ли­ку́я и с пра́ведными собесе́дуя, мо́лится приле́жно о чту́щих ве́рою па́мять его́.

Сла́ва, и ны́не, Богоро́дичен, глас 5:

Стена́ непобеди́мая нам христиа́ном еси́, Богоро́ди­це Де́во: к Тебе́ бо прибега́юще, невреди́мы пребыва́­ем и па́ки согреша́юще, и́мамы Тя моли́твенницу. Тем, благодаря́ще, вопие́м Ти: ра́дуйся, Благода́тная, Госпо́дь с Тобо́ю.

 

По 2-м стихосло́вии седа́лен, глас 5:

Воспое́м вси златоу́стаго Кири́лла, почти́м засту́п­ника, и утвержде́ние гра́ду Ту́рову и всея́ Белору́сския земли́ храни́теля: спаса́й нас, блаже́нне о́тче, мо­ли́твами твои́ми.

Сла́ва, и ны́не, Богоро́дичен, глас 5:

Богоро́дицу Тя́ и́стинную прославля́ем, со святы́м уго́дником Твои́м Кири́ллом, я́ко предвозвести́ на́м отше́ствие того́ на поко́й, чрез явле́ние Купя́тицкаго о́б­раза Твоего́, да чу́до сотвори́ши, и ме́сто сла́вное его́ упокое́ния откры́вши, моля́ще Сы́на Твоего́ спасти́ся душа́м на́шим.

 

Велича́ние:

Велича́ем тя, Ту́ровский подви́жниче и святи́те­лю Кири́лле, златослове́сный Росси́йский учи́телю, и чтим святу́ю па́мять твою́, ты бо еси́ усе́рдный пред Бо́гом предста́телю за род наш и те́плый моли́твенниче о спасе́нии душ на́ших.

 

Псалом избранный:

Блаже́н муж боя́йся Го́спода, в за́поведех Его́ восхо́щет зело́.

 

По полиеле́и седа́лен свята́го, глас 4:

От ю́ности после́довал еси́ Христу́, о́тче наш Ки­ри́лле, сто́лпников на земли́ Ру́сстей нача́льниче, ар­хиере́ев удобре́ние, благоче́стия ре́вностный пропове́дниче, ста́до свое́ до́бре науча́л еси́ моли́тися Го́с­поду. Его́же и ны́не моли́ спасти́ всех, любо́вию тя почита́ющих.

Сла́ва, и ны́не: Богоро́дичен, глас 4:

Де́во Всенепоро́чная, пресу́щественнаго Бо́га ро́ждшая, Того́ со святи́телем на́шим Кири́ллом непре­ста́нно моли́ оставле́ние прегреше́ний и исправле́ние жития́ да́ти нам пре́жде конца́, ве́рою и любо́вию по­ю́щим Тя по до́лгу, еди́на Всепе́тая.

 

Степе́нны, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость, и поуче́ние се́рдца моего́ ра́зум. Стих: Услы́шите сия́ вси язы́цы, внуши́те вси живу́щия по вселе́нней. Вся́кое дыха́ние: Ева́нгелие от Иоа́нна, зача́ло 35.

 

По 50-м псалме́ стихи́ра, глас 6:

Наста́ дне́сь вели́кое торжество́ в кра́е на́шем, про­славля́ем бо златоу́стаго Кири́лла, мно́гими вои́стинну де́лы и словесы́ Бо́гу послужи́, ны́не же во оби́те­лях го́рних Христу́ предстои́т и приле́жно мо́лится  о все́х с любо́вию чту́щих па́мять его́.

 

Кано́н 1-й,

его́же краегране́сие:

Святи́телей и преподо́бных украше́ние.

Творе́ние Гео́ргиево. Глас 6.

 

Песнь 1

Ирмо́с: Се́ченое сече́тся мо́ре Чермно́е, волнопита́емая же изсуша́ется глубина́ та́яжде ку́пно безору́жным бы́вши проходи́ма, и всеору́жным гроб, песнь же богокра́сная воспева́шеся: сла́вно просла́вися Христо́с Бог наш.

Свято́й Тро́ице: Сла́ва Тебе́, Бо́же наш, сла́ва Тебе́.

Смы́сла   Пода́телю   Триипоста́сный   Бо́же,  Ты даждь нам ра́зум и сло́во, да, отве́рзше недосто́йная уста́, воспои́м святи́теля Кири́лла, Ту́ровския земли́ па́стыря и учи́теля и всея́ Руси́ свети́льника.

Припе́в: Святи́телю о́тче Кири́лле, моли́ Бо́га о нас.

Весели́ся ны́не и ра́дуйся, гра́де Ту́рове, ничи́мже ме́ньший ты еси́ в зе́млях Белору́сских, но па́че сла́­вою и че́стию возвели́ченный изря́дных уго́дников Бо́жиих, от ни́хже мы святи́теля Кири́лла днесь бла­гогове́йно прославля́ем.

Я́коже оме́ты вмени́л еси́ бога́тство тле́нное и сла́­ву скороги́бнущую, избра́нниче Бо́жий Кири́лле, от ю́ности яви́вый ума́ твоего́ боже́ственная устремле́ния, я́же ко спасе́нию, во объя́тия О́тча путь указу́ющая.

Богоро́дичен: Ти́хое Приста́нище к Тебе́ прибега́ющих, Преблагослове́нная Влады́чице, моли́ из Тебе́ воплоще́ннаго Христа́ Бо́га на́шего, во е́же бежа́ти нам суеты́ ми́ра сего́, и во вся́ком ме́сте и зва́нии Небе́снаго Ца́рст­вия удосто́итися.

 

Ин кано́н, глас 8,

его́же краегране́сие, кро́ме Богоро́дичнов:

Ту́ровскаго Златоу́стаго пою́.

 

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Иису́су: Го́споди Иису́се Христе́, Бо́же наш, поми́луй мя. Ту́ровскаго святи́теля Кири́лла, земли́ на́шея вели́каго свети́льника, сподо́би, Го́споди, воспе́ти ми не­досто́йному.

Припе́в: Святи́телю о́тче Кири́лле, моли́ Бо́га о нас.

Устне́ и́мый нечи́стая, дерза́ю восхвали́ти архипа́стыря, яви́вшаго ча́дом церко́вным пра́вило ве́ры и о́б­раз смире́ния.

Река́ уче́ний боже́ственных яви́лся еси́, святи́телю Кири́лле, и напоя́еши при́сно мое́ изсо́хшее се́рдце.

Богоро́дичен: Голуби́це Пренепоро́чная, Ма́ти Христа́ Бо́га, при­веди́ мя жа́ждущаго к исто́чнику жи́зни ве́чней.

 

Песнь 3

Ирмо́с: Госпо́дь Сы́й всех и Зижди́тель Бо́г, созда́нное, Безстра́стный, обнища́в, Себе́ соедини́, и Па́сха, за я́же хотя́ше умре́ти, Сам Сый Себе́ предпожре́, яди́те, вопия́, Те́­ло Мое́ и ве́рою утверди́теся.

Измла́да прилежа́л еси́, о́тче, уче́нию кни́жному, и Боже́ственным Писа́нием свы́ше укрепля́емь и просвеще́н, прише́л еси́ во оби́тель и́ноческую порабо́тати Го́сподеви.

Те́ло твое́ посто́м и бде́нием сотвори́л еси́ прия́телище Ду́ха Свята́го, о́тче свяще́ннейший, Кири́лле богому́дре, и́ноком яви́лся еси́ о́браз и пра́вило, па́­че всех тружда́яся.

Е́же не и́мать послуша́ния ко игу́мену и всей во Христе́ бра́тии, я́коже обеща́ся при постриже́нии, таковы́й мона́х спасе́н бы́ти не мо́жет, взыва́л еси́ не­преста́нно, преподо́бнейший, да не уло́вишися в бесо́вския се́ти.

Богоро́дичен: Лю́дие непокори́вии и суему́дреннии, почто́ в похоте́ниях свои́х косне́ете? Поревну́йте послуша́нию Богоотрокови́цы, Я́же Гаврии́лу рече́: Се раба́ Гос­по́дня. И та́ко мы́сляще и де́юще смире́нию нелице­ме́рному навыкно́сте.

 

Ин

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя, Христе́, за́поведей Тво­и́х утверди́: я́ко не́сть свят, па́че Тебе́, Еди́не Человеко­лю́бче.

Оста́вив ми́ра сего́ тле́нная, и́го Христо́во на ра́мо возложи́в, поне́сл еси́ труды́ сугу́быя, на столпе́ в за­тво́ре те́снем.

Воздержа́нием и́стинным и моли́твою непреста́н­ною возше́л еси́ на верх доброде́телей, подо́бно дре́в­ним вели́ким подви́жником.

Сто́лпника но́ваго тя ве́мы, о́тче наш Кири́лле, и ле́ствичника преди́внаго, наста́вника благоче́стия.

Богоро́дичен: Еди́ну   Благослове́нную,   Пречи́стую   Влады́чицу, воспева́ем вси ве́рнии, я́ко Одушевле́нное Не́бо и Пре­сто́л Херуви́мский.

 

Конда́к, глас 3.

Подо́бен: В Ми́рех, свя́те:

В Ту́рове, свя́те, священноде́йствитель показа́лся еси́, Христо́во бо, о́тче Кири́лле, Ева́нгелие испо́л­нив, положи́л еси́ ду́шу твою́ о лю́дех твои́х и со­блю́л еси́ еди́нство Це́ркве Ру́сския. Сего́ ра́ди освяти́лся еси́, я́ко вели́кий таи́нник Бо́жия благода́ти.

 

И́кос:

Воспои́м ны́не святи́теля Кири́лла пе́сньми, Ту́ров­ским лю́дем па́стыря и учи́теля, и всея́ Ру́сския зем­ли́ Златоу́ста, да предста́тельством его́ просвети́мся, и Боже́ственных слове́с его́ поуче́нием отста́нем вся́кия ле́сти и суеты́, порабо́таим неле́ностно Го́сподеви и яви́мся чи́сти душа́ми и телесы́, я́коже и сей уго́д­ник Христо́в и вели́кий таи́нник Бо́жия благода́ти.

 

Седа́лен, глас 4:

От ю́ности взем крест твой, благочести́во Христу́ после́довал еси́, увя́див плотско́е мудрова́ние воздержа́нием. Те́мже на святи́тельском седа́лищи сед, возвели́чил еси́ Влады́ку и Того́ Пречи́стую Ма́терь, о́тче Кири́лле богоблаже́нне.

 

Седа́лен, глас 8.

Подо́бен: Прему́дрости:

Ю́же с высоты́ му́дрость уве́дев и благода́ть слове́с от Бо́га, просия́л еси́ на Руси́ я́ко вторы́й Златоу́ст, сло́во Бо́жие неле́ностно пропове́дал еси́, вся́кое без­зако́ние и лесть попра́в словесы́ твои́ми. Те́мже по Бо́зе ре́вностию кня́зя обличи́в, и Феодо́рца посра­ми́л еси́ ерети́ческое мудрова́ние. Святи́телю Кири́л­ле, моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богоро́дичен:

От Тро́ицы Еди́наго неизрече́нно заче́нши, Де́во, и чу́дно Сего́ родила́ еси́ па́че сло́ва и мы́сли, и о́бщно Боже́ственнаго естества́ устро́ила еси́ челове́ческое естество́, дре́вле изгна́нное. Те́мже, соше́дшеся, Рож­дество́м Твои́м вси спа́сшиися, Всенепоро́чная, Твои́м словесе́м после́дующе, до́лжно Тя ублажа́ем, моля́ще Христа́ Бо́га прегреше́ний оставле́ние дарова́ти ве́рою Тя сла́вящим, Ма́терь Его́.

 

Песнь 4

Ирмо́с: Прови́дев проро́к та́йну Твою́ неизрече́нную, Христе́, провозгласи́: положи́л еси́ тве́рдую любо́вь кре́пости, О́тче Ще́дрый, Единоро́днаго бо Сы́на, Благи́й, очище́ние в мир посла́л еси́.

Ева́нгельских слове́с уче́нием после́дуя, о́тче Ки­ри́лле, избра́л еси́ те́сный путь и та́ко возше́л еси́ на верх доброде́телей, на столпе́ еди́н затвори́вся, под­виза́лся в посте́ и богомы́слии.

Избе́г суесло́вия и пра́здности, Боже́ственными Писа́нии ум свой просвети́л еси́, и во свяще́ннем без­мо́лвии очи́стил еси́ от страсте́й ду́шу, я́же всего́ ми́ра вя́щше.

Изволе́нием Ду́ха Свята́го избра́ша вси лю́дие тя, о́тче Кири́лле, во архипа́стыря Ту́ровскаго, ты
же, неотсту́пному моле́нию их повину́яся, за послуша́ние сан восприя́л еси́, не ра́ди себе́, но ра́ди сла́вы Бо́жия.

Богоро́дичен: Престо́ле о́гненный, ра́дуйся, Неве́сто Неневе́стная, Ма́ти Пречи́стая, Пала́то преукраше́нная, Киво́­те святы́й, Бо́га Невмести́маго Вмести́лище.

 

Ин

Ирмо́с: Услы́шах, Го́споди, смотре́ния Твоего́ Та́инство, разуме́х дела́ Твоя́ и просла́вих Твое́ Божество́.

Кири́лла богому́драго, Боже́ственных Писа́ний ра­чи́теля, ко святи́тельскому служе́нию Вели́кий Архи­ере́й Христо́с призва́л есть.

А́ще и жела́л еси́ уклони́тися от сла́вы земны́я, но оба́че не возмо́гл еси́ презре́ти избра́ния Бо́жия.

Глас твой, о́тче Кири́лле, и до ны́не слы́шен есть: не пренебрега́йте, христиа́не, соверше́нием Боже́ствен­ныя Евхари́стии.

Богоро́дичен: Освяще́нная Трапе́зо, на Не́йже Хле́б сла́дкий испече́ся, Богоро́дице Мари́е, помога́й пою́щим Тя.

 

Песнь 5

Ирмо́с: Сою́зом любве́ связу́еми, апо́столи Влады́чествующему все́ми себе́ Христу́ возло́жше, кра́сны но́ги очища́ху благовеству́юще сем мир.

Раче́ние о па́стве свое́й име́я, ко спасе́нию вы́ну всех наставля́л еси́, сло́вом и житие́м бы́ти христиа́нскаго зва́ния досто́йны.

Едине́ние ду́ха в сою́зе ми́ра соблюда́л еси́, по апо́столу, богому́дре, и ра́спри тлетво́рныя и лука́­вая разделе́ния пресека́л еси́.

Про́клят всяк, и́же мы́слит зла́я, раздели́ти ма́терь на́шу Це́рковь Ру́сскую, таковы́й есть богоотсту́пник, дерзнове́нно провозгласи́л еси́, святи́телю Кири́лле.

Богоро́дичен: Отсека́ют са́ми себе́ от Це́ркве Бо́жия, нечту́щия правосла́вно Пречи́стую Богоро́дицу, мы же ве́рнии немо́лчно Ю велича́ем, Засту́пницу на́шу усе́рдную.

 

Ин

Ирмо́с: У́тренююще вопие́м Ти: Го́споди, спаси́ ны, Ты бо еси́ Бог наш, ра́зве Тебе́ ино́го не ве́мы.

Оглаша́юся твои́ми словесы́ благода́тными, Ту́ров­ский святи́телю, я́же Це́рковь Ру́сская, а́ки би́сер мно­гоце́нный сохраня́ет.

Златослове́сный учи́телю, па́че все́х возсия́вый на Руси́, о́тче на́ш Кири́лле, предста́тельствуй за па́ству твою́ пред Го́сподем.

Люде́й правосла́вных хода́тай, апо́столом подо́бник во благове́стиях и бде́ниях, вои́стинну, о́тче, яви́лся еси́.

Богоро́дичен: Роди́вся от Де́вы, мир просвети́л еси́, Христе́ Бо́же, и мене́ от прегреше́ний мои́х изба́ви, я́ко Человеколю́бец, и упра́ви живо́т мой, молю́ Тя.

 

Песнь 6

Ирмо́с: Бе́здна после́дняя грехо́в обы́де мя и волне́ния не ктому́ терпя́, я́ко Ио́на Влады́це вопию́ Ти: от тли мя возведи́.

До́браго Па́стыря Христа́ стопа́м после́дуя, взы­ска́ли овча́ поги́бшее прише́дшаго, святи́телю Кири́л­ле, потща́лся еси́, да никто́же в па́стве твое́й от злове́рия поги́бнет.

Орга́н Уте́шителя Ду́ха и́стины быв, наста́вил еси́, о́тче, твои́ми писа́нии сыно́в земли́ Ру́сския пресека́ти ко́зни лука́внующих.

Боголю́бскому кня́зю Андре́ю мно́гая посла́ния ду­шеполе́зная написа́в, яви́лся еси́, богодухнове́нный Ки­ри́лле, среди́ бурь жите́йских путево́ждь ко спасе́нию.

Богоро́дичен: На небеса́ возвела́ еси́ естество́ челове́ческое, в ти́не страсте́й иногда́ лежа́вшее, Преблагослове́нная Ма́ти и Де́во, Христа́ Бо́га ро́ждшая.

 

Ин

Ирмо́с: Ри́зу мне пода́ждь све́тлу, одея́йся све́том я́ко ри́зою, Многоми́лостиве Христе́ Бо́же наш.

А́ще и не и́мамы, гре́шнии, еле́я до́брых дел, но мо­ли́твами святи́теля Кири́лла, Светода́вче, нас просвети́.

Тме суеве́рия, отше́дшей иногда́ от па́ствы твоея́, не даждь ны́не поглоти́ти нас, о́тче Кири́лле.

Ору́жием вооружи́вся сло́ва Бо́жия, отгна́л еси́ мглу бесо́вскую и посе́кл еси́ нечести́вое ерети́ческое те́рние.

Богоро́дичен: Госпоже́ Пречи́стая, не оста́ви мя во мра́це ги́блема, но умоли́ Сы́на Своего́ поми́ловати мя окая́ннаго.

 

Конда́к, глас 5:

Бо́дрствуя в моли́твах, послуша́ния и благоче́с­тия до́брый рачи́тель быв, терпе́нию и смире́нию науча́л еси́ па́ству свою́, доброде́тельми преподо́бия и пра́вды ста́до Христо́во озаря́я, и медото́чными словесы́ всю зе́млю Ру́сскую пита́я, на пра́вый путь за́поведей Госпо́дних си́лою ду́ха твоего́ наставля́л еси́ всех, и ны́не просвети́, я́ко со́лнце, лю́ди омра­че́нныя грехми́ и к покая́нию нас приведи́.

 

И́кос:

Прииди́те днесь, лю́дие, похва́лим своего́ святи́теля, глаго́люще ему́: ра́дуйся, Кири́лле, святи́телю честны́й и учи́телю наш, други́й Златоу́ст, на Руси́ па́че всех возсия́, святы́м и пресве́тлым уче́нием тво­и́м концы́ ру́сския просвети́в! Ра́дуйся, я́ко со́лнце омраче́нныя и те́мныя Богоразу́мием просвеща́еши и умудря́еши! Мо́лим ти ся, святи́телю, ма́лое сие́ мо­ле́ние принося́ще: моли́ о нас Вседержи́теля, Ему́же ны́не предстои́ши со дерзнове́нием, от належа́щих бед, скорбе́й, боле́зней и томле́ния вра́жия изба́витися, и от наше́ствия безбо́жнаго ага́рянскаго и междоусо́бныя бра́ни сохрани́тися нам и во Правосла́вии всем утвер­ди́тся. Да улучи́м по ми́лости Бо́жией моли́твами твои́ми грехо́в отпуще́ние и присносу́щных благ на­слажде́ние, с ве́рою и любо́вию со умиле́нием при́сно тебе́ пою́щия: Ра́дуйся, златослове́сный и кро́ткий Росси́йский учи́телю богому́дре Кири́лле, покая́ния, чистоты́ и благоче́стия усе́рдный ревни́телю и моли́твенниче о спасе́нии душ на́ших.

 

Песнь 7

Ирмо́с: О́троцы в Вави́лоне пе́щнаго пла́мене не убоя́шася но, посреде́ пла́мене вве́ржени, ороша́еми, поя́ху: благослове́н еси́, Го́споди Бо́же оте́ц на́ших.

Испо́лнив служе́ние свое́, преше́л еси́ в жи́знь безконе́чную, подвиза́я всех с тобо́ю взыва́ти: благо­слове́н еси́, Го́споди Бо́же оте́ц на́ших.

Христолю́бцы, лику́йте, соверша́юще па́мять свя­ти́теля Кири́лла, и в весе́лии подвиза́йте всех пе́ти: благослове́н еси́, Го́споди Бо́же оте́ц наши́х.

Оте́ческаго благоче́стия ревни́телие, держа́щии свята́го Кири́лла моли́твы и кано́ны, воспо́йте с на́ми вку́пе: благослове́н еси́, Го́споди Бо́же оте́ц на́ших.

Богоро́дичен: Упова́ющии на Тя, Богоро́дице, николи́же посра́м­лены суть, но под кро́вом Твои́м сохраня́еми, благословля́ют Твое́ пред Бо́гом предста́тельство.

 

Ин

Ирмо́с: В нача́ле зе́млю основа́вый, и небеса́ сло́вом утверди́вый, благослове́н еси́ во ве́ки, Го́споди Бо́же оте́ц на́­ших.

Уве́дев непотре́бное умышле́ние раздели́ти Це́р­ковь Ру́сскую, со дерзнове́нием, о́тче, обличи́л еси́ слепца́ и хромца́.

Сла́вным и кра́сным ми́ра сего́ не угожда́л еси́, святи́телю Кири́лле, но Еди́ному Го́споду со благого­ве́нием порабо́тал еси́.

Тро́ицы Пресвяты́я служи́телие, Единосу́щныя и Неразде́льныя, николи́же посра́мятся, ни в сем ве́це, ни в бу́дущем.

Богоро́дичен: Иера́рхов похвало́, иере́ев украше́ние, люде́й Бо́жиих покро́ве ши́рший о́блака Ты еси́, Ма́ти Де́во.

 

Пе́снь 8

Ирмо́с: За зако́ны оте́ческия блаже́ннии в Вавило́не ю́ноши предбе́дствующе, царю́ющаго оплева́ша повеле́ние безу́мное и, совоку́плени, и́мже не свари́шася огне́м, Держа́вствующему досто́йную воспева́ху пе́снь: Го́спода по́йте дела́, и превозноси́те во вся ве́ки.

Кири́лле святи́телю, реши́ти же и вяза́ти от Бо́га име́я вла́сть, вся разреши́ грехопаде́ния твою́ па́мять соверша́ющих, покая́ние те́плое принося́щих, к Ча́­ше Безсме́ртия приступа́ющих, вопию́ще во умиле́нии: Го́спода по́йте дела́, и превозноси́те во вся ве́ки.

Ра́дуйся, святе́йшая Митропо́лие, Це́рковь Бело­ру́сская, я́ко труба́ возглаша́й в день па́мяти святи́те­ля Кири́лла, и́бо Госпо́дь благослови́ и умно́жи тя, архиере́и, свяще́нницы, и́ноцы и вся ча́да твоя́ ны́не велегла́сно взыва́ют: Го́спода по́йте дела́, и превозно­си́те во вся ве́ки.

А́нгелы и челове́цы вку́пе днесь лику́ют, прослав­ля́юще святи́теля Кири́лла, па́ства Ту́ровская пра́зд­нует благогове́йно, я́ко христиа́ном подоба́ет, и хва­лу́ Бо́гови воздае́т: Го́спода по́йте дела́, и превозноси́­те во вся ве́ки.

Богоро́дичен: Шата́нием язы́ческим и суему́дрием плотски́м ос­лепле́н, ум гордели́вый не мо́жет пости́гнути та́инст­во рождества́ Твоего́, Присноде́во, но чист и смире́н се́рдцем, Тя ве́дая и́стинную Богоро́дицу, взыва́ет: Го́спода по́йте дела́, и превозноси́те во вся ве́ки.

Ин

Ирмо́с: На горе́ святе́й просла́вльшася и в купине́ ог­не́м Присноде́вы Моисе́ови та́йну я́вльшаго, Го́спода по́йте и превозноси́те во вся ве́ки.

А́постолом подо́бяся, благове́стниче преди́вный, изъясни́л еси́ ве́рным во вся́ком де́ле и сло́ве Боже́ст­венная Писа́ния.

Глаго́лы богодухнове́нныя, путеводя́щия в Небе́с­ное Ца́рствие, пропове́дал еси́ пра́отцем на́шим, перво­учи́телю Кири́ллу подража́я.

Освяще́нный богоно́сче, ми́ром пома́занный свя­ти́телю Бо́жий, Тро́ицу во Еди́ном Существе́ пое́ши и превозно́сиши во вся ве́ки.

Богоро́дичен: Обра́дованная, ра́дуйся, с Тобо́ю Госпо́дь, со А́р­хангелом Гаврии́лом и мы воспева́ем дерзнове́нно.

 

Песнь 9

Ирмо́с: Ве́чное обре́тше избавле́ние, от пра́отца Ада́ма свы́ше рожде́нное, ро́ду стра́шнаго изрече́ния, рождество́ со безпло́тными непостижи́мое славосло́вим, Богоро́дицу Тя пе́сньми велича́юще.

Ежеле́тняя па́мять твоя́, сла́вне, духо́вная весно́ всем ве́рным яви́ся, зима́ грехо́вная упраздни́ся, и лику́ет днесь па́ства Ту́ровская, я́коже цвета́ми, пе́сньми Це́рковь Христо́ву украша́ющи.

Ны́не с на́ми веселя́тся святи́и му́ченицы Бори́с и Глеб, и Лавре́нтий и Марти́н затво́рницы, и кня́зи Андре́й и Бори́с, и свяще́ннейшии страда́льцы Мака́рий, Иоа́нн и ини́и мно́зии, вку́пе со святи́телем Ки­ри́ллом, Ту́ровския земли́ свети́льницы.

Иорда́нским струя́м подо́бящися, взыгра́й, реко́ При́пяте, ко свяще́нному Днепру́ и гора́м Ки́евским во́ды своя́ несу́щи и возвраща́ющи вспя́ть кресты́ ка́менныя, я́же и до ны́не зе́млю Ту́ровскую освяща́ют.

Богоро́дичен: Ея́же ра́ди просла́вися земля́ на́ша да́же и до Ки́е­ва, Пречу́дная Ма́ти Бо́жия, на кресте́ Купя́тицкий о́браз Сво́й яви́вшая и нас гре́шных ми́лостивно уте­ша́ющая, при́сно хвале́бными гла́сы Тя велича́ем.

 

Ин

Ирмо́с: Проявле́нное на горе́ Законополо́жнику во огни́ и купине́ рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Покая́ния наста́вниче, моли́твенниче преизя́щный, помоли́ся Христу́ Бы́гу о почита́ющих па́мять твою́.

О́тче Кири́лле, Ту́ровский Златоу́сте, восхваля́ем тя немо́лчно, пе́сньми свяще́нными велича́юще.

Ю́ноши и ста́рцы, всяк во́зраст и сосло́вие, поуча́­ются твои́ми, святи́телю, наказа́ньми и исправле́ньми.

Богоро́дичен: Сло́ва  па́че   сло́ва  ро́ждшая,   Пречи́стая,   моли́ся приле́жно ко Влады́це, в Небе́снем Оте́честве со святи́телем Кири́ллом и нам водвори́тися.

 

Свети́лен:

Све́тлым уче́нием Богоразу́мия своего́ просвети́, блаже́нне о́тче, всех соверша́ющих па́мять твою́.

Сла́ва.

Подо́бен: Же́ны, услы́шите:

Ра́дуйся, гра́де Ту́рове наш древне́йший, сла́внаго твоего́ иера́рха Кири́лла святы́я мо́щи храня́щий, я́ко то́й тя по всем конце́м ру́сским просла́ви, и я́ко вто­ра́го Златоу́ста его́ днесь воспева́й пе́сньми.

И ны́не, пра́здника.

 

На хвали́тех стихи́ры, глас 5:

Ра́дуйся, о́трасле благоче́стия роди́телей всече́стная, ты измла́да прему́дрость Бо́жию возлюби́л еси́, заба́в мирски́х и бога́тства тле́ннаго отве́ргся, оби́те­лью Ду́ха Свята́го соде́лался еси́ и храм благода́ти труды́ свои́ми освяти́л еси́, смире́нием и чистото́ю жития́ люде́й гра́да своего́ удивля́я, всем се́рдцем люби́ти Бо́га и нас научи́.

Ра́дуйся, дре́вняго Ту́рова свяще́нная главо́, свя­ти́телю о́тче наш Кири́лле, по сло́ву Писа́ния те́сным путе́м Христу́ после́довав, побо́рник страсте́й яви́лся еси́ и кра́сными доброде́телей свои́х исправле́ньми и́ноков и па́ству свою́ в послуша́нии наставля́я, моли́ дарова́ти мир и единомы́слие ста́ду твоему́.

Ра́дуйся, богому́дре учи́телю Це́ркве Ру́сския, ты сия́нием Со́лнца пра́вды просвети́вся, ору́жием сло́ва твоего́ моли́твеннаго тьму язы́ческую и ко́зни вра́жия разгна́л еси́, богопропове́дуя от волко́в хи́щных ста́до твое́ упа́сл еси́ и вертогра́д плодоно́сный из чад ду­хо́вных возде́лал еси́ кня́зей от междоусо́бия к лю́бви и едине́нию призыва́я, в Ве́ре Правосла́вной па́ству твою́ утверди́.

Ра́дуйся, богоблаже́нне о́тче Кири́лле, покая́ния и благоче́стия ревни́телю, адама́нте чу́дный и би́сере честны́й, те́ло твое́ свято́е до вре́мене сокры́то за гре­хи́ на́ши. Наве́тов злых и напа́стей отгоня́я и про­ше́ния ве́рных исполня́я, яви́ ми́лость соверша́ющим па́мять твою́.

Сла́ва, глас 8:

Освяще́нный Божестве́нным Ду́хом я́ко чи́стый сосу́д духо́внаго ми́ра благоуха́ние источа́вши всем ве́рным, прехва́льне святи́телю наш Кири́лле, земли́ Белору́сския сла́во и украше́ние моли́ о всех, любо́вию чту́щих па́мять твою́.

И ны́не, пра́здника.

На Литурги́и:

Блаже́нны от Кано́на 1-го на 8, пе́сни 3-я и 6-я. Проки́мен, глас 4: Уста́ моя́ возглаго́лют прему́дрость и поуче́ние се́рдца моего́ ра́зум. Стих: Хвали́те Го́спо­да, я́ко благ Госпо́дь. Апо́стол: Ко евре́ем, зача́ло 310. Аллилуа́рий: Глас 4: Блаже́н муж, боя́йся Го́спода. Стих: Услы́ши, Бо́же, глас мой, внегда́ моли́тимися к Тебе́. Ева́нгелие от Матфе́я, зача́ло 11.

 

Молитва

    О преди́вный подви́жниче, пресла́вный святи́телю, златослове́сный Святы́я Руси́ учи́телю, вели́кий уго́дниче Бо́жий, Кири́лле! Измла́да Вы́шних благ взыску́я, зна́тность ро́да и земна́я бога́тства, я́ко уме́ты, вмени́л еси́, блаже́нне, возлюби́л же еси́ всем се́рдцем нищету́, бде́ние, поще́ние, смире́ние, скорбь и тесноту́ и́ночества, еще́ же и вя́щший Христа́ ра́ди по́двиг подъя́л еси́, восше́д на столп, досточу́дне! Му́дрствуя Го́рняя, испыту́я, что есть во́ля Бо́жия, блага́я, уго́дная и соверше́нная, непреста́нно ду́шу и се́рдце пита́л еси́ Боже́ственными уче́ньми. Умоле́н быв архипа́стырем бы́ти, вои́стинну до́бре упасл еси́ Ту́ровскую па́ству твою́, пита́я ее́ здра́выми уче́ньми Правосла́вныя ве́ры и приводя́ к Ца́рствию Небе́сному. Те́мже яви́лся еси́ и́ноков вождь, подви́жников сла́ва, Правосла́вия столп, Це́ркве Ру́сския свети́ло, па́стырем и архипа́стырем о́браз, всем ве́рным до́брый руководи́тель к и́стине и пра́вде. Ве́лиим показа́лся еси́ в Ца́рствии Бо́жием, вся бо запове́данная Бо́гом сам неле́ностно сотвори́в, и пре́дков на́ших научи́л еси́ твори́ти. Сего́ ра́ди, к тебе́, Богому́дре Кири́лле, воспева́я  просла́вльшагося в тебе́ Бо́га, прибега́ем и, чту́ще твою́ па́мять мо́лимся: бу́ди хода́тай за нас, недосто́йных, пред Го́сподом Бо́гом. Твои́ми моли́твами и заступле́нием да утверди́тся в нас и́стинный дух живо́й ве́ры и свята́го благоче́стия, да сохрани́мся все мы благода́тию Бо́жиею от неве́рия, неправове́рия и суеве́рия, от нра́вственнаго шата́ния и духо́вной не́мощи.

Вели́кий уго́дниче подви́жниче Христо́в! Моли́ Ми́лостиваго Бо́га, да и́здревле изоби́льно обита́вшия в Руси́ стремле́ние к вы́сшему нра́вственному соверше́нству, любо́вь к и́ночеству, забо́та о благосостоя́нии церкве́й и благоле́пии хра́мов, ре́вность о благочи́нии богослуже́ния церко́внаго вы́ну пребыва́ют достоя́нием на́шим не ослабева́я, не умаля́ясь, но укрепля́ясь, возраста́я и преуспева́я.

Святи́телю Кири́лле! Да бу́дут моли́твами твои́ми во Оте́честве на́шем па́стыри слове́снаго ста́да Христо́ва ду́хом горя́щии, Го́сподеви рабо́тающии, а не себе́ угожда́ющии, па́ству, а не себе́ пасу́щии. Да бу́дут они́ до́брыми па́стырями, ду́шу свою́ полага́ющими за о́вцы па́ствы своея́, а не нае́мниками, небрегу́щими о о́вцах и при ви́де во́лка бе́гающими и оставля́ющими о́вцы на расхище́ние. Ты, блаже́нне Кири́лле, и сло́вом и писа́нием учил еси́ дре́вле князе́й и всех люде́й Святы́я Руси́ ходи́ти досто́йно зва́ния своего́. При́зри и на нас, пото́мков твои́х, чад и ученико́в, и умоли́ Бо́га, да низпошле́т стране́ на́шей тве́рдость и благоустрое́ние, зако́нам на́шим свя́тость и си́лу, прави́телем и судия́м му́дрость, усе́рдие, безкоры́стие и нелицеприя́тие. Испроси́ у Всеще́драго Бо́га всем нам и коему́ждо по́рознь благопотре́бная, я́же к животу́ и благоче́стию: не́мощным в ве́ре и до́брых де́лех укрепле́ние, па́дшим восста́ние, подвиза́ющимся до́бре преуспе́яние. Да не оскудева́ют в роди́телех согла́сие, любо́вь, взаи́мное уваже́ние, друг о дру́ге благопопече́ние, в рожде́нии чад Бо́жие благослове́ние. Ча́да, воспита́нныя в стра́хе Госпо́днем, да уразуме́ют прему́дрость Бо́жию и да младе́нствуют зло́бою, а не умо́м. Детоводи́тели и наста́вники да избы́точествуют в ве́дении и во вся́ком чу́встве, па́че же да изоби́луют благоче́стием и о бла́ге и́стиннем дете́й попече́нием.

О пречу́дный святи́телю Кири́лле! Сам зри́ши страну́, в не́йже роди́лся еси и мно́го потруди́лся еси́; зри́ши наро́д, его́же дре́вле просвети́л еси́. Сам ве́си, я́же тре́буем, ве́си на́ша не́мощи и согреше́ния. Бу́ди же нам помо́щник, покрови́тель, засту́пник и упра́витель жи́зни на́шея. Да под твои́м покро́вом и заступле́нием досто́йно бу́дем сла́вить Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.

Распечатать Распечатать

Комментирование закрыто.