Служба преподобномученика Серафима, архимандрита Жировицкаго

(15 / 28 октября́)

На ма́лой вече́рни

На Го́споди, воззва́х стихи́ры на 4, глас 1:

Ми́ра сего́ су́етная отве́рг, по́двиги духо́вныя прия́л еси́, о́тче,   во оби́тели Жиро́вицстей послуша́нию навы́к, и отту́ду свети́льник ве́рным показа́лся еси́, ко спасе́нию ве́чному  правосла́вныя  лю́ди приводя́.  Поруга́ния  и  темни́цу  от безбо́жных претерпе́в, смерть за Христа́ Спа́са прия́ти не устраши́лся еси́. Его́же моли́ проще́ние грехо́в всем нам дарова́ти и ве́лию ми́лость душа́м на́шим. (Дважды).

Богому́дре блаже́нне о́тче Серафи́ме, очервле́ньми твоея́ кро́ве свяще́нную оде́жду украси́л еси́, от си́лы бо благоче́стно в си́лу, и от сла́вы в сла́ву Боже́ственную ра́дуяся преше́л еси́, и ны́не моли́ся дарова́ти душа́м на́шим мир и ве́лию ми́лость.

Же́ртву пе́рвее Бо́гу принося́ безкро́вную, я́ко свяще́нник зако́ннейший, богоглаго́ливе всече́стне, по́слежде я́ко всепло́дие и прия́тну же́ртву, тебе́ сама́го кро́вию, я́ко му́ченик и́стиннейший  Христу́ прине́сл еси́, Его́же моли́ о пою́щих тя.

Сла́ва, и ны́не, Богоро́дичен пра́здника, глас то́йже:

Жи́зни Вы́шния жела́ющи, сию́ оста́вила еси́, Богороди́тельнице Отрокови́це, де́вства цве́те, Христа́ ро́ждшая, всех Живота́; благогове́йно   предстоя́ше   апо́стольский собо́р  честно́му  Твоему́  погребе́нию, Богоневе́стная.

 

На стихо́вне стихи́ры, глас 2.

Подо́бен:  Земле́ Ру́сская…:

Весь Жиро́вицкая, оби́тель свята́я, украша́й твой дом, в не́мже архимандри́та Серафи́ма ди́вный во святы́х Госпо́дь просла́ви.

Стих: Честна́ пред Го́сподем смерть преподо́бных Его́.

Це́рковь Белору́сская, красу́йся и лику́й, се бо Серафи́м Жиро́вицкий с со́нмом новому́чеников предстои́т престо́лу Госпо́дню.

Стих: Блаже́н муж боя́йся Го́спода, в за́поведех Его́ восхо́щет зело́.

Собо́ре новому́чеников Белору́сских, по́лче Боже́ственный, моли́теся ко Го́споду о земне́м Оте́честве ва́шем и о почита́ющих вас любо́вию.

Сла́ва, глас и подо́бен то́йже:

Но́вый до́ме Евфра́фов, уде́ле избра́нный, Русь Свята́я, храни́ ве́ру правосла́вную, в не́йже тебе́ утвержде́ние.

И ны́не, глас и подо́бен то́йже:

Две́ри Небе́сныя, возми́теся, зря́щия дверь Вы́шняго, иду́щу со сла́вою к Сы́ну и Бо́гу.

Тропа́рь, глас 2:

Пла́менем ве́ры разже́гся, свети́льник яви́лся еси́ Белору́сстей Це́ркви, возсия́вый во оби́тели Жиро́вицстей. Я́ко па́стырь до́брый, ве́рныя ко спасе́нию наста́вивый и ду́шу свою́ за Христа́ положи́вый, преподобному́чениче Серафи́ме, моли́ о нас Всеще́драго Бо́га.

Сла́ва, и ны́не, Богоро́дичен, глас то́йже:

 По́мощи от Тебе́ тре́бующия не пре́зри, Влады́чице, и милосе́рдия бе́здну отве́рзи всем, притека́ющим к цельбоно́сней ико́не Твое́й. Печа́ли на́ша жите́йския утоли́, Всеще́драя, и от юдо́ли сея́ плаче́вныя к ра́дости ве́чней ве́рныя Твоя́ преста́ви, Тебе́ бо вси стяжа́хом наде́жду и утвержде́ние, ми́лости исто́чник, покро́в и спасе́ние душ на́ших.

 

На вели́цей вече́рни

На Го́споди, воззва́х стихи́ры на 8, глас 6:

По и́мени твоему́ та́ко и житие́ твое́, преподобному́чениче Серафи́ме, о́гненною ре́вностию я́же по Бо́зе уподо́бился еси́ проро́ком Илии́ и Крести́телю,  Иса́ии и трие́м отроко́м, и сла́вным дре́вним и но́вым му́чеником, с ни́ми же моли́ся за оби́тель и лю́ди, соверша́ющия па́мять твою́. (Два́жды)   

   О́тче Серафи́ме прехва́льне, досто́йнейший учени́че Бо́жия Ма́тере, в Ея́же уде́ле на  Бе́лей  Руси́,  во  оби́тели Жиро́вицстей крест Христо́в на ра́мо восприи́м, со сла́вою проне́сл еси́ его́ да́же до сме́рти, моли́ся приле́жно к Небе́сней Игу́мении на́шей за оби́тель и бра́тию  соверша́ющия па́мять твою́. (Два́жды)

Егда́ приспе́ вре́мя послужи́ти тебе́ вне оби́тели во труде́х благове́стнических, за послуша́ние с ра́достию текл еси́ на предлежа́щий по́двиг, непреста́нно воспева́я я́ко свиде́тель Христо́в: Благослове́н гряды́й во и́мя Госпо́дне!

Тве́рдостию адама́нту подо́бный, сорабо́тник яви́лся еси́ в виногра́де Христо́вем, во Святе́й Це́ркви, ея́же опло́т нае́мницы сатани́нския тща́хуся разори́ти и люде́й правосла́вных коне́чне истреби́ти, ты же, свя́тый Серафи́ме, взыва́л еси́: Це́рковь Христо́ва пребу́дет до сконча́ния ве́ка, ю́же никто́ в ми́ре си́лен сокруши́ти, осно́вана бо есть на Ка́мени.

      Серафи́ме о́тче наш, благода́тию свяще́нства еси́ почте́н, Безкро́вную Же́ртву приноси́л еси́ за всех и за вся, и сам я́ко же́ртва непоро́чная му́ченическою свое́ю кро́вию прине́слся еси́ Бо́гови, и с ли́ки святы́х в Неизрече́ннем   Све́те   пребыва́еши и мо́лишися о душа́х на́ших.

     Любо́вию спаса́йтеся, бра́тие, любо́вию я́же к Бо́гу и бли́жнему, любо́вию да́же до сме́рти за дру́ги своя́, и не посра́млени бу́дете ни в сем ве́це, ни в бу́дущем, я́коже Серафи́м Жиро́вицкий.

Сла́ва, глас 8:

      Ра́дуйся, земле́ Белору́сская. красу́йся и лику́й, оби́тель   Жиро́вицкая,   воспо́й, гра́дец Ля́ховичи, торжеству́йте, гра́ды и ве́си, преде́ли Ми́нстии  и  Слу́цстии, Могиле́встии и Ви́тебстии, Го́мельстии и       Гро́дненстии, ваш вели́кий моли́твенник и засту́пник, Серафи́м Жиро́вицкий, днесь прославля́ется Го́сподем.

И  ны́не, глас то́йже:

      Царь Небе́сный за человеколю́бие на земли́ яви́ся и с челове́ки поживе́, от Де́вы бо Чи́стыя плоть прие́мый и из Нея́ проше́дый с воприя́тием, Един есть Сын, сугу́б естество́м, но не Ипоста́сию. Те́мже, соверше́нна Того́ Бо́га и соверше́нна Челове́ка    вои́стинну    пропове́дающе, испове́дуем Христа́ Бо́га на́шего, Его́же моли́, Ма́ти Безневе́стная, поми́ловатися душа́м на́шим.

 

Вход. Проки́мен дне. Чте́ния три.

 

Проро́чества Иса́иина чте́ние (глава́ 43):

Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. Кто возвести́т сия́? Или́, я́же испе́рва, кто возвести́т вам? Да приведу́т свиде́тели своя́, и оправдя́тся, и да услы́шат, и да реку́т и́стину. Бу́дите Ми свиде́тели, и Аз Свиде́тель, глаго́лет Госпо́дь Бог, и О́трок Мой, Его́же избра́х: да уве́сте, и ве́руете Ми, и уразуме́ете, я́ко Аз есмь. Пре́жде Мене́ не бысть ин бог, и по Мне не бу́дет. Аз Бог, и несть, ра́зве Мене́, спаса́яй. Аз возвести́х и спасо́х, укори́х и не бе в вас чу́ждий. Вы Мне свиде́тели, и Аз Свиде́тель, глаго́лет Госпо́дь Бог. Еще́ от нача́ла, и несть изыма́яй от руку́ Мое́ю. Сотворю́, и кто отврати́т е? Та́ко глаго́лет Госпо́дь Бог, избавля́яй вас, Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их: и е́же от нас ше́ствие – сокруше́ние, они́ же суть в ми́ре. И́бо пред лице́м челове́ческим, а́ще и му́ку прии́мут, упова́ние их безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я и обре́те их досто́йны Себе́. Я́ко зла́то в горни́ле, искуси́ их и, я́ко всепло́дие же́ртвенное, прия́т я. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину и ве́рнии в любви́ пребу́дут Ему́. Я́ко благода́ть и ми́лость в преподо́бных Его́ и посеще́ние во избра́нных Его́.

           

Прему́дрости Соломо́новы чте́ние (гла́вы 5 и 6):

Пра́ведницы во ве́ки живу́т, и в Го́споде мзда их, и попече́ние их у Вы́шняго. Сего́ ра́ди прии́мут ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я и мы́шцею защити́т их. Прии́мет всеору́жие рве́ние свое́ и вооружи́т тварь в месть враго́м. Облече́тся в броню́ пра́вды и возложи́т шлем суд нелицеме́рен. Прии́мет щит непобеди́мый преподо́бие, поостри́т же напра́сный гнев во ору́жие, спобо́рет же с ним мир на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т, и от каменоме́тныя я́рости испо́лнь паду́т гра́ды. Вознегоду́ет на них вода́ морска́я, ре́ки же потопя́т я на́гло. Сопроти́в ста́нет им дух си́лы и, я́ко ви́хор, разве́ет их, и опустоши́т всю зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните, судии́ конце́в земли́. Внуши́те держа́щии мно́жества и гордя́щиися о наро́дех язы́к, я́ко дана́ есть от Го́спода держа́ва вам и си́ла от Вы́шняго.

 

На литии́ стихи́ра хра́ма, та́же стихи́ры свята́го, глас 1.

Подо́бен: О, ди́вное чу́до…:

О, ди́вное чу́до! Оби́тель Жиро́вицкая врага́ми бе обстои́ма, и невреди́ма да́же до днесь пребыва́ет. Весели́теся, Жиро́вичи, Богоро́дичен святы́й до́ме. Возопии́м, ве́рнии, свята́го Серафи́ма иму́ще предста́теля: Преподо́бне о́тче, ра́дуйся, тобо́ю Госпо́дь подае́т нам по́мощь и ве́лию ми́лость.

Глас 3:

От за́пада земли́ Белору́сския к су́щим на восто́це   бра́тиям   прише́дый   Серафи́м Жиро́вицкий та́ко благовести́, глаго́ля: дерза́йте, лю́дие, и пока́йтеся, отступи́те от пре́лести сатани́нския и после́дуйте Христу́ Бо́гу, И́же есть Путь и И́стина и Живо́т Ве́чный.

Глас 7:

В темни́цу заточе́н был еси́ я́ко злоде́й, но гони́телей   не   устраши́лся   еси́,   о́тче Серафи́ме, ве́рою победи́л еси́ врага́ и посрами́л еси́ того́ ловле́ния.

Сла́ва, глас 5:

Ра́дуйся, преподобному́чениче Серафи́ме, оби́тели Жиро́вицкия подви́жниче и Це́ркве Белору́сския украше́ние, в годи́ну тя́жких испыта́ний  защи́тниче  пра́выя  ве́ры, па́стырю   до́брый   ста́да Христо́ва, разсе́янная ча́да церко́вная вку́пе собра́вый и научи́вый небоя́зненно прославля́ти в Тро́ице Еди́наго Бо́га.        

И ны́не, глас то́йже (пра́здника Успе́ния):

Воспо́йте, лю́дие, Ма́тери Бо́га на́шего, воспо́йте: днесь бо всесве́тлую ду́шу Свою́ в пречи́стыя дла́ни И́же из Нея́ вопло́щшагося без Се́мене предае́т, Его́же и мо́лит непреста́нно  дарова́ти вселе́нней мир и ве́лию ми́лость.

 

На стихо́вне стихи́ры, глас 2.

Подо́бен:  Земле́ Ру́сская…:

Весь Жиро́вицкая, оби́тель свята́я, украша́й твой дом, в не́мже архимандри́та Серафи́ма ди́вный во святы́х Госпо́дь просла́ви.

Стих: Честна́ пред Го́сподем смерть преподо́бных Его́.

Це́рковь Белору́сская, красу́йся и лику́й, се бо Серафи́м Жиро́вицкий с со́нмом новому́чеников предстои́т престо́лу Госпо́дню.

Стих: Блаже́н муж боя́йся Го́спода, в за́поведех Его́ восхо́щет зело́.

Собо́ре новому́чеников Белору́сских, по́лче Боже́ственный, моли́теся ко Го́споду о земне́м Оте́чествии ва́шем и о почита́ющих вас любо́вию.

Сла́ва, глас и подо́бен то́йже:

Но́вый до́ме Евфра́фов, уде́ле избра́нный, Русь Свята́я, храни́ ве́ру правосла́вную, в не́йже тебе́ утвержде́ние.

И ны́не, глас и подо́бен то́йже:

Две́ри Небе́сныя, возми́теся, зря́щия дверь Вы́шняго, иду́щу со сла́вою к Сы́ну и Бо́гу.

 

По Ны́не отпуща́еши тропа́рь свята́го (два́жды) и Богоро́дице Де́во (еди́ножды).

 

Тропа́рь свята́го, глас 2:

Пла́менем ве́ры разже́гся, свети́льник яви́лся еси́ Белору́сстей Це́ркви, возсия́вый во оби́тели Жиро́вицстей. Я́ко па́стырь до́брый, ве́рныя ко спасе́нию наста́вивый и ду́шу свою́ за Христа́ положи́вый, преподобному́чениче Серафи́ме, моли́ о нас Всеще́драго Бо́га.

 

На у́трени

На Бог Госпо́дь: тропа́рь свята́го, два́жды. Сла́ва и ны́не, Богоро́дичен:

Вся, па́че смы́сла, вся пресла́вная Твоя́, Богоро́дице, та́инства, чистоте́ запеча́­танней и де́вству храни́му, Ма́ти позна́лася еси́ нело́жна, Бо́га ро́ждши И́стиннаго. Того́ моли́ спасти́ся душа́м на́шим.

 

По 1-м стихосло́вии седа́лен, глас 4:

Земны́х и тле́ющих наслажде́ния небре́гл еси́, о́тче Серафи́ме, и житие́ и́ноческое  возлюби́л еси́, ми́ра красоты́ и пи́щи вре́менныя возненави́дел еси́, и отсю́ду сподо́бился еси́ му́ченическому и по́стническому сочета́тися ли́ку: с ни́миже моли́ спасти́ рабы́ твоя́.

Сла́ва, и ны́не, глас то́йже:

Торжеству́ет днесь оби́тель Жиро́вицкая, соверша́ющи пра́зднество свята́го архи­мандри́та Серафи́ма, на ме́сте том, иде́же яви́ся чудотво́рная ико́на Бо́жия Ма́тере, иде́же и доны́не обита́ет благода́ть Бо́жия, бра́тию в духо́вных по́двизех укрепля́ющи,  благочести́вых  ю́ношей   в   богомы́слии умудря́ющи и всем христиа́ном во вся́кой нужде́ помога́ющи.

 

По 2-м стихосло́вии седа́лен, глас 6:

Преподо́бне о́тче Серафи́ме, во Святе́м Креще́нии Рома́ном нарече́н был еси́, те́мже Сладкопе́вцу подража́я, вы́ну воспева́л еси́ псалмы́ Дави́довы, я́же на моли́тву и покая́ние нас подвиза́ют и из ка́менных серде́ц источа́ют сле́зы.

Сла́ва, и ны́не, глас то́йже:

Соше́дшеся днесь во оби́тель Жиро́вицкую, сотвори́м моли́тву,  празднолю́бцы,  со слеза́ми пред ди́вно явле́нною ико́ною Богоро́дицы пою́ще: приими́, Влады́чице, моле́ния на́ша, и принеси́ их Твоему́ Сы́ну и Бо́гу, да спасе́т Тобо́ю ду́ши на́ша.

 

Велича́ние

Ублажа́ем   тя, преподобному́чениче Серафи́ме, и чтим святу́ю па́мять твою́, наста́вниче мона́хов и собесе́дниче А́нгелов.

 

Псало́м избра́нный:

1. Терпя́ потерпе́х Го́спода, и внят ми, и услы́ша моли́тву мою́. Ублажа́ем…

2. Благовести́х пра́вду в Це́ркви вели́цей.

1. И́стину Твою́ и спасе́ние Твое́ рех.

2. Пове́м И́мя Твое́ бра́тии мое́й, посреде́ Це́ркве воспою́ Тя.

 И про́чии стихи́, ели́цы екклисиа́рх разсу́дит.

 

Седа́лен по полиеле́и, глас 8:

Ра́дуйся и лику́й, уде́ле Бо́жия Ма́тере, сла́вная оби́тель Жиро́вицкая, се бо ди́вный во святы́х Свои́х Госпо́дь дарова́ тебе́ но́ваго засту́пника и моли́твенника, всечестна́го архимандри́та Серафи́ма, апо́столом и му́чеником единонра́внаго.

Сла́ва, и ны́не, глас то́йже:

Днесь   торжеству́ет   све́тло   оби́тель Жиро́вицкая, прославля́ющи Ма́терь Бо́жию, ме́сто сие́ освяти́вшую и о́браз Свой, я́ко дар многоце́нный, лю́дем оста́вившую. Тем у́бо припа́даем, ве́рнии, к  честне́й  ико́не Влады́чицы, да́рует бо ве́рным освяще́ние и укрепля́ет сердца́ малоду́шная, в жизнь ве́чную приводя́щи.

 

Степе́нна 1-й антифо́н 4-го гла́са. Проки́мен, глас 4: Честна́ пред Го́сподем смерть преподо́б­ных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Мат­фе́я, зача́ло 43.

По 50-м псалме́ стихи́ра, глас 6:

Преподо́бне о́тче Серафи́ме, во всю зе́млю Белору́сскую изы́де веща́ние исправле́ний твои́х: тем на небесе́х обре́л еси́ мзду трудо́в твои́х, де́монов погуби́л еси́ полки́, и а́нгелов пости́гл еси́ чины́, и́хже житию́ непоро́чно поревнова́л еси́, и му́ченическим венце́м украси́лся еси́, дерзнове́ние име́я ко Христу́ Бо́гу, мир испроси́ душа́м на́шим.

 

Кано́н

Бо́жией Ма́тери, явле́ния ра́ди Ея́ ико́ны Жиро́вицкия. глас 4, с ирмосо́м на 6, и свята́го на 8, глас 8, его́же краегране́сие:

Моли́ Бо́га о нас, му́чениче о́тче Серафи́ме.

Песнь 1

Ирмо́с: Отве́рзу уста́ моя́,  и напо́лнятся ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́, ра́дуяся, Тоя́ чудеса́.

В Тя, одушевле́нный черто́же, Бог всели́ся и, чрез Тебе́ проше́д, яви́ся Спас ми́ра Госпо́дь, те́мже Тя, Богоро́дице, вои́стинну велича́ем.

Ты еси́, Ма́ти Бо́жия, ми́ру предста́тельница, мо́лим Тя, Де́во: простри́ ру́це Свои́ богоно́сне к Сы́ну Твоему́ Боже́ственному, о нас умоля́ющи, да поми́лует лю́ди Своя́ погиба́ющия.

Госпоже́ Пречи́стая,  Ма́ти  Бо́жия, Помо́щнице на́ша всеси́льная, Ты бо к Тебе́ прибега́ющим ми́лость чрез ико́ны цельбоно́сныя да́руеши, и ны́не Тя мо́лим, Пречи́стая: освяти́ нас ико́ною Твое́ю чудотво́рною, ю́же во оби́тели Жиро́вицстей просла́вила еси́.

Кто Тебе́ не ублажи́т, Пресвята́я Де́во?   А́нгельский собо́р и челове́ческий род по до́лгу Тя прославля́ет: Тебе́ бо ра́ди Христо́с в мир яви́ся, Его́же прославля́юще, Тя велича́ем.

 

Ин кано́н свята́го, глас 8.

Песнь 1

(Ирмо́с: Во́ду проше́д я́ко су́шу…)

Мно́гими содержи́мь напа́стьми к тебе́, преподобному́чениче Серафи́ме, прибега́ю, по́мощи и утеше́ния иски́й, предста́тельством твои́м у Влады́ки Христа́ ты ми помози́.

Омраче́ния душе́внаго и теле́сных неду́гов умоли́ Го́спода изба́вити нас, свя́тче Бо́жий, пла́менный и́менем и житие́м.

Ле́ности сон оттря́сше, усе́рдно просла́вим Христа́ Жизнода́вца, дарова́вшаго нам ди́внаго   засту́пника   и   помо́щника неусы́пнаго.

       Богоро́дичен: Игу́мение Небе́сная оби́тели Жиро́вицкия, Преблагослове́нная  Влады́чице, укрепи́ нас в по́двизе послуша́ния.

 

Песнь 3

Ирмо́с: Твоя́ песносло́вцы, Богоро́дице, живы́й и незави́стный исто́чниче, лик себе́ совоку́пльшия духо́вно утверди́ в боже́ственней Твое́й сла́ве, венце́в сла́вы сподо́би.

       Ты еси́ Одиги́трия, Деви́це, Путеводи́тельница на́ша, не оста́ви лю́ди, Тебе́  возлюби́вшия, но при́сно руководи́, чрез мо́ре жите́йское препровожда́ющи в Ца́рство Преве́чное Сы́на Твоего́.

Ма́ти ро́ду челове́ческому изво́лила еси́ бы́ти, Пречи́стая, те́мже мы, я́ко ча́да неуте́шная, к Тебе́, Засту́пнице ро́да христиа́нскаго, усе́рдно прибега́ем: не оста́ви нас си́рых, Влады́чице, но ско́ро простри́ ру́ку Свою́ благоде́ющую, изыма́ющую ны от ти́ны грехо́вныя, утвержда́ющи на пути́ покая́ния.

       Звездо́ пресве́тлая, Богоро́дице, ико́нами чудотво́рными мир озари́вшая, просвети́ наш ра́зум, грехми́ помраче́нный, и да́руй нам сла́вити Тя во ве́ки.

      Днесь, ве́рнии. любо́вию совокупи́вшиися, Ма́терь Бо́жию просла́вим, пропове́дующе чудеса́ Ея́, от ико́ны Жиро́вицкия явле́нныя, и Спа́су вопие́м: приими́ моли́твы ро́ждшия Тя Богоро́дицы и спаси́ ду́ши на́ша.

 

Ин

 (Ирмо́с: Небе́снаго кру́га…)

Боле́зни и обстоя́ния в житии́ свое́м терпели́во понесы́й, о́тче Серафи́ме, очи́стился еси́, я́ко зла́то в горни́ле.

Оби́тели Жиро́вицкия и́нок был еси́, от мирска́го мяте́жа удали́выйся, и нам на вся́ком ме́сте нелицеме́рно Го́сподеви угоди́ти сподо́би.

Го́рькаго угрызе́ния зми́ева, чрез вне́шних и вну́тренних, изба́ви нас, Сердцеве́дче Го́споди, моли́твами Серафи́ма уго́дника.

Богоро́дичен: А́ще и прогневля́ем Бо́га ежеча́сно, но не отступа́ем  коне́чне;  Пресвята́я Богоро́дице, упра́ви нас на стези́ покая́ния.

 

Седа́лен, глас 3:

Преподобному́ченик Серафи́м днесь предстои́т  престо́лу   А́гнца   и   с Пречи́стою Де́вою Игу́мениею Жиро́вицкою, и со А́нгелы и все́ми святы́ми восклица́ет дерзнове́нно: благослове́ние, и сла́ва, и прему́дрость, и хвала́, и честь, и си́ла, и кре́пость на́шему Бо́гу во ве́ки веко́в. Ами́нь.

Песнь 4

Ирмо́с: Седя́й в сла́ве на престо́ле Божества́, во о́блаце ле́гце прии́де Иису́с пребоже́ственный, нетле́нною дла́нию, и спасе́ зову́щия: сла́ва Христе́ си́ле  Твое́й.

Ны́не сла́вит правосла́вных люде́й мно́жество чудеса́ Твоя́, Богоро́дице, зе́млю бо Ру́сскую нам озари́вшая и свет Правосла́вия утверди́вшая.

Купино́ Неопали́мая, о́браз Свой во огни́ неврежде́нно сохра́ншая, попали́ скве́рну душ на́ших, ко святе́й ико́не Твое́й с ве́рою прибега́ющих.

Ты, Влады́чице, ико́ну Свою́ па́ки дарова́ла еси́ на ка́мени ве́лием во оби́тели Жиро́вицстей, назна́менуя нам путь спасе́ния на ка́мени ве́ры – Христе́.

Днесь А́нгели и челове́цы песнь Го́сподеви воспева́ют, сла́вяще Пречи́стую Де́ву Богоро́дицу.

 

Ин

 (Ирмо́с: Услы́шах, Го́споди…)

Обурева́ния и смуще́ния по́мыслов умоли́ Го́спода изба́вити нас, о́тче Серафи́ме, и небе́снаго покоя́ дости́гнути.

Не и́мамы зде пребыва́ющаго гра́да, но гряду́щаго взыску́ем, со апо́столом глаго́лал еси́ вы́ну, Серафи́ме благове́стниче.

   А́нгеле земны́й и небе́сный челове́че, Серафи́ме о́тче наш, наставля́й нас к ти́хому приста́нищу.

Богоро́дичен: Сла́внейшую без сравне́ния Серафи́м и Честне́йшую   Херуви́м   и   Го́рних Во́инств, су́щую Богоро́дицу возвели́чим, ве́рнии, в пе́снех.

                                              

Песнь 5

Ирмо́с: Ужасо́шася вся́ческая о Боже́ственней сла́ве Твое́й: Ты бо неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, всем воспева́ющим Тя мир подава́ющая.

Прииди́те, ве́рнии, ко кла́дезю ми́лостей – Бо́жией Ма́тери, всех нас покро́вом Свои́м покрыва́ющей и о спасе́нии на́шем Христа́ умоля́ющей.

Кто  испове́сть  чудеса́ Твоя́,  Богороди́тельнице? Да́руеши бо ве́рным ми́лости бога́тыя и исцеля́еши неду́ги душе́вныя и теле́сныя.

Вси притека́ющии с ве́рою к цельбоно́сному о́бразу Твоему́, Де́во, прие́млют освяще́ние и по́мощь в напа́стех, на ны находя́щих.

Ра́дуйся, оби́тель Жиро́вицкая, сокро́вище ве́лие зде храня́щая, покро́в неви́димый, свет неме́ркнущий – о́браз Чи́стыя Богоро́дицы.

 

Ин

 (Ирмо́с: Просвети́ нас повеле́нии…)

Мра́ком душе́вным одержи́ми, к тебе́, о́тче Серафи́ме, вопие́м, помози́ нам  преити́ безбе́дно к Невече́рнему Све́ту.

 Узре́в стра́ждущую па́ству, блужда́ющую я́ко в пусты́ни, о́тче Серафи́ме, яви́лся еси́ для них свети́льник ве́ры и благоче́стия.

Черто́г Твой, Спа́се, ви́жду украше́нный и не и́мам бра́чныя оде́жды, стыжду́ся наготы́ грехо́вныя, пощади́ мя моли́твами свята́го Серафи́ма.

Богоро́дичен: Еле́ем ми́лости, Премилосе́рдная Влады́чице, всера́достное  Заступле́ние, исцели́ моя́ грехо́вныя стру́пы.

 

Песнь 6

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те рука́ми воспле́щим, от Нея́ ро́ждшагося Бо́га сла́вим.

Лику́йте, и́ноцы, днесь бо Небе́сная Игу́мения оби́тели Жиро́вицкия прославля́ется,  днесь   бо   бога́тства   ми́лости излива́ются   от   ико́ны    Пресла́вныя Богоро́дицы.

Ты еси Наста́внице целому́дрия, Ты еси́ Учи́лище благоче́стия, Ты еси́ любве́  неистощи́мый Исто́чник, святы́й о́браз нам яви́вшая.

Облагодати́ наш ум, ни́зу прекло́ншийся, Де́во Пречи́стая Богоро́дице, Тя ны́не  ра́достно сла́вящих.

Воспо́йте, ве́рнии, песнь Боже́стненную, сла́вяще Ма́терь Бо́жию, Христа́ всему́ ми́ру роди́вшую.

      

Ин

 (Ирмо́с: Моли́тву пролию́ ко Го́споду…)

Ниневи́тяны в покая́нии поми́лова и Ио́ну из чре́ва ки́това изба́ви, и всем хо́щет ве́чнаго спасе́ния Госпо́дь, Его́же мо́лит о нас Серафи́м Жиро́вицкий.

Илии́ проро́ку ре́вностию подража́я, не угожда́л еси́ ду́ху ми́ра сего́, но безбоя́зненно, Серафи́ме, вся́кому пропове́дал еси́ ве́чныя глаго́лы.

Ча́шу муче́ния до конца́ испи́л еси́, благодаря́ Го́спода, сподо́бившаго тя равноапо́стольно послужи́ти благове́стию Ева́нгелия.

Богоро́дичен: Ея́же ико́ною оби́тель Жиро́вицкая сла́вится, Пречи́стая Богома́ти, Ты еси́ Стена́ Неруши́мая правосла́вных жи́тельству.

 

Конда́к, глас 2:

Я́ко благове́стником Христо́вым соревни́теля, и послу́шника Бо́жия Ма́тере ве́рнаго, и страда́льца за Це́рковь Бо́жию честна́го, в пе́снех воспои́м архимандри́та Серафи́ма приснохва́льнаго: той бо зми́я попра́л есть.

       

 И́кос:

        Страсте́м Госпо́дним поревнова́в, преблаже́нне, за Того́ умре́ти возжела́л еси́, лесть безбо́жнаго разори́л еси́ му́жески подвиза́яся проти́ву враго́в, тех злохи́трственная ловле́ния и ко́зни низложи́л еси́, и вене́ц по́чести прия́л еси́ досто́йне, преподо́бне страда́льче. Тем я́ко но́ваго моли́твенника почита́ем  архимандри́та Серафи́ма, оби́тели Жиро́вицкия похвалу́ и всея́ земли́ Белору́сския украше́ние: той бо зми́я попра́л есть.

 

Песнь 7

Ирмо́с: Не послужи́ша тва́ри богому́дрии па́че Созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в Госпо́дь и Бог, благослове́н еси́.

 Осуши́ сле́зы ско́рбных, Ра́досте на́ша Богоро́дице, к Тебе́ с ве́рою приходя́щих, и да́руй нам по́мощь ве́лию.

Не оста́ви, Пречи́стая, ту́не рабо́в Твои́х, к честне́й ико́не Твое́й со стра́хом припа́дающих, и умоли́ о нас  Всеси́льнаго Бо́га на́шего, да да́рует ми́лость в День су́дный.

О́браз Твой святы́й прославля́юще, ра́дуемся, Влады́чице, По́моще на́ша и Стено́ Неруши́мая всех, с ве́рою к Тебе́ прибега́ющих.

           О Тебе́ ра́дуемся и Тя прославля́ем, Де́во Пречи́стая, я́ко Невмести́маго вмести́ла еси́, Его́же при́сно моли́ о спасе́нии на́шем.

                                     

Ин

 (Ирмо́с: От Иуде́и доше́дше о́троцы…)

Оби́тель Жиро́вицкую оста́вил еси́, о́тче, за послуша́ние, в годи́ну лю́тых испыта́ний, и яви́лся еси́ Белору́сстей Це́ркви благове́стник и свиде́тель.

Тве́рдостию ве́ры, о́тче Серафи́ме, сокруши́л еси́ зу́бы враго́в, и слеза́ми умиле́ния погаси́л еси́ пла́мень стра́стный.

Ча́я Воскресе́ния со святы́ми, Серафи́м Жиро́вицкий не убоя́ся о́гненнаго искуше́ния.

Богородичен: Егда́ оскуде́ет благоче́стие и безпло́дною смоко́вницею соде́лается се́рдце, изле́й ми ро́су ми́лости, Пречи́стая Ма́ти Де́во.

 

Песнь 8

Ирмо́с: О́троки благочести́выя в пещи́ рождество́ Богоро́дицо спасло́ есть: тогда́ у́бо образу́емое, ны́не же де́йствуемое, вселе́нную всю воздвиза́ет пе́ти Тебе́: Го́спода по́йте дела́, и превозноси́те Его́ во вся ве́ки.

Ки́ими пе́сньми  просла́вим  Богоро́дицу, да́ры нам вели́кия подаю́щую, чудоде́йственным бо о́бразом Свои́м подвиза́ет нас к пе́нию: Го́спода по́йте, дела́, и превозноси́те во вся ве́ки.

 О, безчи́сленное чуде́с мно́жество ро́ду христиа́нскому яви́вшая и ми́лости Своя́ неоску́дно источа́ющая, тем Тя пое́м во вся ве́ки.

Я́коже о́троцы неопали́мии в пещи́ яви́шася, та́ко де́вство в рождестве́ сохрани́ла еси́, Пречи́стая Де́во Богоро́дице, тем Тя пое́м во вся ве́ки.

Христа́ славосло́вим, ми́ра Спаси́теля, Де́ву Пречи́стую сла́вим, я́ко вои́стинну Богоро́дицу.

 

Ин

 (Ирмо́с: Царя́ Небе́снаго…)

Сло́во Бо́жие не вя́жется, разуме́йте, безу́мнии, и умудри́теся, зря́ще прославле́ние Серафи́ма Жиро́вицкаго с со́нмом новому́чеников.

Е́же ти жи́ти Христо́с, и е́же смерть приобре́тение, му́чениче сла́вный, вои́с­тинну показа́л еси́.

Ра́дуйся, свети́льниче пресве́тлый, его́же поста́ви Госпо́дь верху́ горы́, да све́тиши ве́рным и науча́еши прославля́ти Отца́ Небе́снаго.               

Богоро́дичен: А́ще и родила́ еси́ Сы́на, но пребыла́ еси́ Де́ва, я́коже и о́троцы неопали́мии в пещи́ Вавило́нстей яви́шася.

 

Песнь 9

Ирмо́с:   Всяк  земноро́дный   да взыгра́ется ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, всеблаже́нная Богоро́дице, чи́стая Присноде́во.

Премилосе́рдная Влады́чице, приими́ моли́твы всех, Тя ны́не сла́вящих и о́браз Твой че́ствующих, да́руй всем оставле́ние прегреше́ний мно́гих.

Приими́ ны, пою́щия Тебе́, Де́во, и к о́бразу Твоему́, я́ко к зна́мению ми́лости  Твоея́, притека́ющия, и да́руй рабо́м Твои́м ми́лости превели́кия.

Облагоуха́й ны, многогре́шныя, Влады́чице, смра́ду грехо́вному прича́стныя,  изми́ ны из про́пасти поги́бельныя,

утверди́вши во благоче́стии.

Спа́се ми́ра и Го́споди, приими́ песнь ра́достную, дал бо еси́ лю́дем Засту́п­ницу, Ю́же велича́юще, Тя при́сно сла́вим.

 

Ин

 (Ирмо́с: Вои́стинну Богоро́дицу…)

Фарисе́йскаго высокоу́мия избеги́й, о́тче Серафи́ме, смире́нием испо́лнил еси́ ду́шу, и нам помози́ позна́ти глубину́ своея́ грехо́вности.

Иерусали́ма но́ваго жи́телю, наста́ви ны, во стра́нствии су́щия, не уклоня́тися в развраще́ния,   но   взыска́ти   Ца́рствия Небе́снаго.

Мно́гими словесы́ невозмо́жно есть восхвали́ти по́двиги уго́дника ди́внаго, ему́же подража́ти, Го́споди, нас сподо́би.              

Богоро́дичен: Ели́цы в послуша́нии Бо́жия Ма́тере неле́ностно рабо́тают, не погубя́т мзды своея́, показу́ет нам Серафи́м Жиро́вицкий.

Свети́лен:

Оби́тель яви́лся еси́ Ду́ха Пресвята́го, о́тче Серафи́ме,

по́двиги и́ноческими просия́в  и  му́ченическим венце́м украси́вся, о нас непреста́нно моли́, почита́ющих твою́ па́мять ве́рою и любо́вию.

Сла́ва, и ны́не:

Спаси́ от бед рабы́ Твоя́, Премилосе́рдная Влады́чице, я́ко мы усе́рдно к Тебе́ во оби́тели Жиро́вицстей прибега́ем, я́ко к Неруши́мей Стене́ и Предста́тельству, ско́рой Помо́щнице и Хода́таице жи́зни  ве́чныя.

                                    

На хвали́тех стихи́ры на 4, глас 4:

Воста́ните от гробо́в ва́ших, и́ноцы Жиро́вицстии и рцы́те со дерзнове́нием нам, коли́ких чуде́с Пречи́стыя Богома́тере вы бы́сте свиде́телие, я́ко Бо́гу споспешеству́ющу  по́двиги  ва́шими победи́ли есте́ врага́ и те́сным и терни́стым путе́м вошли́ есте́ в Небе́сныя Оби́тели.

Дре́вняя оби́тель Жиро́вицкая просто­то́ю и смире́нием изве́стная, мно́гия упра́вила есть ко спасе́нию, зде во труде́х и испове́дничестве просия́ша святи́телие Христо́вы Ермоге́н, Пантеле́­имон, Ти́хон, и па́ки но́вый Ермоге́н, и сла́вный Петр, митрополи́т Крути́цкий.

И́ноцы Жиро́вицстии, ве́рнии дела́телие виногра́да  Христо́ва  и  Всецари́цы Богома́тере чистото́ю украше́нныя: Серафи́м небоя́зненный благове́стник, и сорабо́тник его́ Игна́тий и ины́й Серафи́м, и Иоа́нн, и трудолю́бный Порфи́рий, с ни́миже Иерони́м Святого́рец досто́йно да ублажа́тся.

Не мни́те су́етно, бра́тие, я́ко ме́сто прибли́зит нас к Бо́гу, и́бо на вся́ком ме́сте  исполня́яй   во́лю   Бо́жию прия́тен есть и не погуби́т мзды́ своея́, я́коже Серафи́м Жиро́вицкий, в безве́стнем ме́сте за Христа́ убие́нный и ве́чную жизнь насле́дивый.

Сла́ва, глас 6:

Жиро́вицкая оби́тель, и́здревле сла́вная чудесы́ от ико́ны Богома́терни, мно́гия и́ноки  Бо́гови   воспита́.   Та́мо   и преподо́бный Серафи́м по́двигом до́брым подвиза́ся, чу́дную Богома́терь сла́вя, и, прие́м благослове́ние Пречи́стыя, обтека́ше преде́лы Белору́сския, ве́рныя укрепля́я,   заблу́ждшия   вразумля́я, хра́мы Бо́жии из ме́рзости запусте́ния возставля́я. Те́мже и му́ченичества вене́ц по мно́зех труде́х па́стырства своего́ до́блестне прия́т. Сего́ ра́ди воспои́м,  лю́дие,  Христа́  Бо́га и Пречи́стую Его́ Ма́терь возблагодари́м, я́ко и́мамы преподобному́ченика сла́в­на и моли́твенника о душа́х на́ших достоблаже́нна.

                             И ны́не, Успе́ния, глас то́йже:

На   безсме́ртное   Твое́   успе́ние, Богоро́дице Ма́ти  Живота́,  о́блацы апо́столы по возду́ху восхища́ху, и, по ми́ру разсе́янныя, во еди́ном ли́це предста́ша пресвято́му Твоему́ те́лу, е́же и погре́бше че́стно, глас Тебе́ Гаврии́лов пою́ще, вопия́ху: ра́дуйся, Благода́тная Де́во, Ма́ти Безневе́стная, Го́сподь с Тобо́ю. С ни́миже, я́ко Сы́на Твоего́ и Бо́га на́шего, моли́ спасти́ся душа́м на́шим.

   

 

На Литурги́и:

Блаже́нна от кано́на, песнь 3-я и 6-я, на 8. Проки́мен, глас 7: Восхва́лятся преподо́бнии во сла́ве, и возра́дуются на ло́жах свои́х. Апо́стол к Тимофе́ю, зача́ло 291. Ева́нгелие от Ма́рка, зача́ло 37. Прича́стен: В па́мять ве́чную бу́дет пра́ведник…

 

Моли́тва

О, пречу́дный уго́дниче Христо́в, святы́й преподобному́чениче Серафи́ме, оби́тели Жиро́вицкия похвало́ и Це́ркве Белору́сския украше́ние! Приими́ сие́ ма́лое моле́ние от нас, гре́шных и обремене́нных страстьми́ мно́гими, но к твоему́ те́плому   предста́тельству   усе́рдно прибега́ющих.

Испроси́ у Всеще́драго Бо́га Це́ркви Святе́й, Собо́рней и Апо́стольстей, мир и тишину́, вся́ких собла́знов, ересе́й и раско́лов неприча́стие, архипа́стырем и па́стырем му́дрость и ре́вность к сла́ве Бо́жией, и́ночествующим в по́двизех послуша́ние, моли́твы и поста́ укреп­ле́ние, уча́щим и уча́щимся в богомы́слии де́ятельное возраста́ние и всем ча́дом церко́вным в ве́ре и благоче́стии преуспе́яние.

Страну́ на́шу, гра́ды и ве́си ея́, я́же проше́л еси́ в годи́ну тя́жких испыта́ний, охрани́ моли́твами твои́ми от огня́, пото́па,   тру́са,   гла́да,   вра́жескаго наше́ствия и вну́тренних нестрое́ний.

О испове́дниче Христо́в! Я́ко име́яй дерзнове́ние к Бо́жией Ма́тери, от лет дре́вних весь Жиро́вицкую в уде́л Себе́ избра́вшую, моли́ся приле́жно к Небе́сней Игу́мении на́шей, да сохрани́т оби́тель сию́ невреди́му от всех наве́т вра́жиих да́же до сконча́ния ве́ка.

Егда́ же приспе́ет час кончи́ны на́шея, помози́ нам в тве́рдости ду́ха и чи́стей со́вести предста́ти пред Го́сподем и, сподо́бившеся десна́го предстоя́ния со все́ми святы́ми, убели́вшими ри́зы своя́ в Кро́ви А́гнчей, но́вую песнь воспе́ти в Тро́ице сла́вимому Бо́гу, Отцу́ и Сы́ну и Свято́му Ду́ху, во ве́ки веко́в. Ами́нь.

Распечатать Распечатать

Комментирование закрыто.